- वि.सं २o७८ श्रावण २६ मंगलबार
कीर्तिपुर नगरपालिकामा कृषि विकास बैंक लिमिटेडले एक्सटेन्सन काउन्टर सञ्चालनमा ल्याएको छ । बैंकले काउन्टर सञ्चालनका साथै नगरपालिका परिसरमा बगैँचा निर्माण गरिदिएको हो ।
काउन्टरको नगरपालिकाका मेयर रमेश महर्जनले उद्घाटन गरेका हुन् । उद्घाटनपछि मेयर महर्जनले बैंकले उपलब्ध गराउने सेवाहरूले स्थानीय जनताको आर्थिक तथा सामाजिक स्थिति सक्षम–सबल बनाउनमा विशेष महत्व खेलेको भन्दै आगामी दिनमा स्थानीयबासीको मन छुने गरी अझ बढी प्रभावकारी सेवा उपलब्ध गराउने अपेक्षा व्यक्त गरेका थिए । नगरपालिका परिसरमा एक्सटेन्सन काउन्टरको स्थापना गरी राजस्व संकलन कार्य तथा बैंकिङ सेवाका लागि सहज हुने उनको भनाइ थियो ।
उक्त नगरपालिका परिसरमा राखिएको एटिएम मेसिन तथा ढुंगेधारासहितको बगैँचा उद्घाटन पनि नगरप्रमुख महर्जन र बैंकका प्रमुख कार्यकारी अधिकृत अनिलकुमार उपाध्यायले गरेका थिए । एटिएम तथा बगैँचा उद्घाटनपछि प्रमुख कार्यकारी अधिकृत उपाध्यायले बैंकले उपलब्ध गराएका सेवाहरूको पूर्ण उपभोग गर्न सर्वसाधारणलाई आग्रह गरेका थिए । बैंकले भविष्यमा थप सेवाहरू सञ्चालन गर्ने उनले बताए ।
