- वि.सं २o७८ असार २१ सोमबार
एमालेको विवाद समाधान गर्न गठित कार्यदल पुनः सक्रिय भएको छ । खनाल–नेपाल पक्षले कांग्रेस सभापति शेरबहादुर देउवालाई प्रधानमन्त्री बनाउन हस्ताक्षर गरेपछि निष्क्रिय भएको कार्यदलको बैठक सोमबार सिंहदरबारमा बसेको छ ।
बैठकपछि नेताहरूले छलफल सकारात्मक भएको र सहमतिनजिक पुगेको बताएका छन् । एमाले उपाध्यक्ष भीम रावलले बैठक निरन्तर बस्ने सहमति भएको बताए ।
एमालेभित्रको आन्तरिक राजनीति बिग्रँदै जाँदा पार्टी विभाजन हुने आशंकाबीच बैठकमा सकारात्मक छलफल भएको सचिव गोकर्ण विष्टले जानकारी दिए ।
अघिल्लो महिना अध्यक्ष केपी ओली र वरिष्ठ नेता माधवकुमार नेपालबीच भएको भेटवार्तापछि कार्यदल गठन भएको थियो ।
कार्यदलमा ओली पक्षबाट सुवास नेम्वाङ, विष्णु पौडेल, शंकर पोखरेल, प्रदीप ज्ञवाली र विष्णु रिमाल छन् भने खनाल–नेपाल पक्षबाट भीम रावल, सुरेन्द्र पाण्डे, रघुजी पन्त, घनश्याम भुसाल र गोकर्ण विष्ट छन् ।
