महोत्तरीमा गत १९ जेठदेखि बेपत्ता भएकी एक महिलाको हत्या भएको आशंकामा प्रहरीले खोजी थालेको छ । बेपत्ता महिलाको माइती पक्षले छोरीको हत्या गरिएको र खेतमा शव गाडेको दाबी गरेपछि प्रहरीले खोजी थालेको हो ।
लोहारपट्टी नगरपालिका– ७ घर भएका मुकेश ठाकुरकी श्रीमती सुजितादेवी ठाकुर १९ जेठदेखि बेपत्ता छिन् । माइती पक्षले दाबी गरेको स्थानमा कपाल भेटिएको छ । मुकेशकै खेतमा चार फिट खन्दा कपाल भेटिएको प्रहरीले बताएको छ ।
प्रहरीले उक्त स्थानमा घेराबार लगाएको छ । महोत्तरीका एसपी दिनेश आचार्यले आफूहरूले अनुसन्धान गरिरहेको भन्दै तत्काल केही भन्न नसकिने बताए । सोही खाल्डोमा शव हुने आशंकामा प्रहरीको अनुसन्धान टोलीसमेत घटनास्थल पुगिसकेको छ ।
पीडित पक्षले गत साता बेपत्ता महिलाको ससुरा ५० वर्षीय पतिराम ठाकुर, देवर २६ वर्षीय रूपेश ठाकुर र देउरानी २५ वर्षीया रोमी ठाकुरविरुद्ध प्रहरीमा किटानी जाहेरी दिन खोजेकोमा तत्काल प्रहरीले उक्त जाहेरी लिन इन्कार गरेको थियो । त्यसपछि खोजतलासका लागि पीडित परिवारले निवेदन दिएका थिए ।