- वि.सं २o७८ जेठ २९ शनिबार
कांग्रेसले १४औँ महाधिवेशनको कार्यतालिका फेरबदल गरेको छ । सभापति शेरबहादुर देउवाको निवासमा शनिबार अपराह्न बसेको शीर्ष नेताहरूको बैठकले भदौमै महाधिवेशन गर्ने गरी कार्यतालिका फेरबदल गर्ने निर्णय गरेको हो ।
बैठकले शीर्ष नेताहरूका बीचमा नयाँ कार्यतालिकाबारे साझा धारणा बनाएर केन्द्रीय समितिमा आगामी बैठकमा प्रस्तावको रूपमा पेस गर्ने निर्णय गरेको छ । बैठकले भदौको १६, १७, १८ र १९ गते केन्द्रीय महाधिवेशन सम्पन्न गर्ने गरी महाधिवेशनको कार्यतालिका फेरबदल गर्ने प्रस्ताव पारित गरेको सहमहामन्त्री डा. प्रकाशशरण महतले बताए ।
उनका अनुसार केन्द्रीय क्रियाशील सदस्यता छानबिन समितिले सदस्यता छानबिनका लागि २० असारसम्मको समय पाएको छ । समितिले सभापतिलाई क्रियाशीलको सूची बुझाइसकेपछि २४ असारमा सूची सार्वजनिक गरिनेछ । र, ६ साउनबाट तल्ला तहको अधिवेशन सुरु गर्ने प्रस्ताव पारित भएको छ । ‘यो अनौपचारिक बैठक हो, यहाँ एउटा मोटामोटी साझा धारणा बनेको छ । यो आगामी केन्द्रीय समिति बैठकबाट पास भएपछि कार्यान्वयनमा जान्छ,’ डा. महतले भने ।
यसअघि कांग्रेसले ७ देखि १० भदौमा केन्द्रीय महाधिवेशन गर्ने गरी कार्यतालिका बनाएको थियो । तर, सो कार्यतालिकाअनुसार पूर्वतयारी गर्न नसकेपछि पुनः नयाँ कार्यतालिका बनाएको हो । पूर्वनिर्धारित कार्यतालिकाअनुसार महाधिवेशनको तयारी भएको भए ५ असारबाट तल्ला तहको अधिवेशन सुरु हुनुपर्ने हो ।
