Skip This
कोरोना संक्रमण बढिरहेको वेला रामेछापको खाँडादेवी प्रगतिशील युवा समाजले पकरबास स्वास्थ्यचौकीलाई अक्सिजनसहित मेडिकल सामग्री सहयोग गरेको छ । प्रगतिशील युवा समाजको अगुवाइमा खाँडादेवी प्रगतिशील विपत् कोषबाट कोरोना महामारी नियन्त्रण तथा रोकथामका लागि खाँडादेवी– ५ स्थित पकरबास स्वास्थ्यचौकीलाई मेडिकल सामग्री सहयोग गरिएको हो ।
अक्सिजन कन्सन्ट्रेटर दुई थान, इलेक्ट्रोनिक औजार सफा गर्ने अटोकेल्भ एक थान, स्यानिटाइजरसहितका सामग्री सहयोग गरिएको समाजका अध्यक्ष राकेश श्रेष्ठले जानकारी दिए । सबैको सहयोगमा स्वास्थ्य सामग्री वितरण गर्न सम्भव भएको उनले बताए ।
खाँडादेवी गाउँपालिकाकी उपाध्यक्ष मखमली श्रेष्ठले स्वास्थ्य सामग्री सहयोग गरेकोमा समाजलाई धन्यवाद दिइन् । सामूहिक प्रयासबाटै महामारीलाई परास्त गर्न सकिने उनले बताइन् । ‘अब अक्सिजनविना अकालमा ज्यान जाँदैन,’ उनले भनिन्, ‘गाउँपालिकाले उपचारका लागि आवश्यक प्रबन्ध मिलाएको छ । सहयोग आउने क्रम पनि जारी रहेको छ ।’
