व्यावसायिक तरकारी खेतीबाट जिल्लाको खार्पुनाथ गाउँपालिका–४, छिप्राका महिलाहरूले वार्षिक ५ लाखसम्म आम्दानी गर्दै आएका छन् । बेमौसमी र मौसमी तरकारी खेतीबाटै आकर्षक आम्दानी गर्दै आएकी खार्पुनाथ गाउँपालिका–४ की कृषक मोतीशिला रावलले बताइन् । 

आफूले राम्रो कमाइ गर्न थालेपछि रावल व्यावसायिक महिला कृषकहरूको गतिलो अगुवा बनेकी छिन् । तरकारी खेतीबाटै छोराछोरी र घरपरिवारको खर्च चलाउँदै आएको उनले जानकारी दिइन् । मौसम र बेमौसममा गाँजर, धनियाँ, प्याज, टमाटर, काँक्रो, सागलगायतका खेतीले घरपरिवार र छोराछोरी पढाउने खर्च धानेको उनको भनाइ छ । 

गुड नेभर्स संस्थाले ग्रिन हाउसका लागि त्रिपाल र कृषि सामग्री दिएपछि आफूहरूलाई राहत महसुस भएको उनले बताइन् । अर्की कृषक बाँचकली रावलले पनि घरनजिकै बेमौसमी तरकारीका लागि ठूलो ग्रिन हाउसमा साग, धनियाँ, गोलभेँडा, प्याज फलाउँदै आएकी छिन् । आफ्नो पढाइ–लेखाइ नभएपछि तरकारी खेती गरी छोराछोरी पढाउँदै आएको उनले बताइन् । ‘म खुसी छु, तरकारी खेतीबाटै वर्षमा ४ लाख हुन्छ,’ उनले भनिन्, ‘गुड नेभर्स संस्थाले हामी अशिक्षित महिलाहरूलाई तरकारी खेतीमा जोड्ने काम गरिदियो ।’ 

छोराछोरीलाई उच्च शिक्षा यही तरकारी खेतीबाट हुने गरेको बताइन् । महिलाहलाई झट्ट विश्वास नगर्ने नेपाली समाज यतिवेला ठूलै हिम्मत बटुलेर हुम्लाका महिलाहरू निर्वाहमुखी खेती प्रणालीलाई बदलेर व्यावसायिक बाटो रोजेका छन् । छिप्रा गाउँका महिलाहरू बेमौसमी रूपमा तरकारी उत्पादनमै हिजोआज सक्रिय देखिँदै आएका छन् । तरकारी खेती गरेकै कारण लेखपढ गर्न नजान्ने स्थानीय महिलाहरूले पनि आफ्नो आम्दानी र हिसाबकिताबसमेत राख्न थालेका छन् ।