चीनको मध्यक्षेत्रमा कोभिड– १९ का नयाँ बिरामी देखिएनन्
चीनको मध्यक्षेत्रमा स्थानीय रूपमा प्रसारित कोरोना भाइरसका बिरामी नदेखिएको राष्ट्रिय स्वास्थ्य आयोगले जनाएको छ । आयोगद्वारा दैनिक सार्वजनिक गर्ने विवरणमा मंगलबार मध्य क्षेत्रमा विदेशबाट आएका पाँचजनामा मात्रै कोरोना संक्रमण देखिएको उल्लेख छ ।
स्थानीय व्यक्तिमा संक्रमण भएका एक शंकास्पद व्यक्ति भित्री मंगोलियामा देखिएको आयोगले जनाएको छ । कुनै पनि व्यक्तिको कोरोना संक्रमणका कारण मृत्यु नभएको पनि आयोगको भनाइ छ । विदेशबाट आएर सांघाई, फुजियान, गुआङदोङ र साङ्सीमा रहेका व्यक्तिमा कोरोना पुष्टि भएको थियो ।
मंगलबारसम्ममा चीनको मध्यक्षेत्रमा कुल तीन हजार आठ सय नौजनामा कोरोना संक्रमण देखिएको थियो । तीमध्ये तीन हजार पाँच सय २३ जना डिस्चार्ज भइसकेका छन् भने दुई सय ८६ जना अस्पतालमा उपचार गराइरहेका छन् । आयोगका अनुसार विदेशबाट आएका संक्रमित कुनै पनि व्यक्तिको मृत्यु भएको छैन ।
चीनको मध्यक्षेत्रमा हालसम्म ८६ हजार चार सय ६९ व्यक्ति कोरोनासबाट संक्रमित भएका थिए भने कुल चार हजार ६ सय ३४ जनाको मृत्यु भएको थियो । अझै पनि तीन सय पाँचजना उपचारका क्रममा छन् जसमध्ये ६ जनाको स्वास्थ्य अवस्था निकै गम्भीर रहेको छ । ‘मेनल्यान्ड चाइना’ भनेर चिनिने चीनको उहानसमेत मध्यक्षेत्रमा कोरोनाबाट सबैभन्दा धेरै प्रभावित स्थल हो ।