- वि.सं २o७७ असोज २५ आइतबार
लमजुङमा अहिलेसम्म कुल संक्रमितको संख्या चार सय २५ पुगेको छ । संक्रमित हुनेमा पुरुष तीन सय २५ र महिला सयजना छन् । जसमध्ये तीन सय ६२ जनाले कोरोना संक्रमणलाई जितेका छन् । अहिले यहाँ सक्रिय संक्रमित ६३ जना छन् ।
निको भएर घर फर्किएका तीन सय ६२ मध्ये ८४ जना महिला र दुई सय ७८ जना पुरुष रहेका छन् । हाल जिल्लामा रहेका विभिन्न आइसोलेसनमा १६ जना महिला र ४७ जना पुरुष गरी जम्मा ६३ जना मात्र सक्रिय संक्रमित छन् ।
आइतबार पाँचजनामा कोरोना भाइरस संक्रमण पुष्टि भएको छ । कोरोना परीक्षणका लागि स्वाब संकलन गरी पोखरा पठाइएका चारजना पुरुष र एक महिलामा कोरोना पुष्टि भएको हो । आइतबार पाँचजना नयाँ संक्रमित थपिएसँगै जिल्लामा कोरोना संक्रमितको संख्या चार सय २५ पुगेको हो ।
सहायक प्रमुख जिल्ला अधिकारी काजीमान सुनारका अनुसार आइतबार संक्रमित हुनेमा बेसीसहर- ८ का २०, २२ र ५३ वर्षका पुरुष, बेसीसहर- ७ का २७ वर्षीया महिला र मर्स्याङ्दी गाउँपालिका-३ का २० वर्षीय पुरुषमा कोरोना देखिएको हो ।
