कोलम्बियामा भूकम्पमा हराएकाको खोजी तीव्र

कोलम्बियामा यस शताब्दीकै सबैभन्दा शक्तिशाली मानिएको भूकम्पमा परी २२४ जनाको मृत्यु भएको छ भने थुप्रै बेपत्ता भएका छन् । भूकम्पले मुख्य क्षति पुर्‍याएको देशको पश्चिमी भेगमा भत्किएका भवनका बिचबाट उद्धारकर्ताले मानिसको खोजी गरिरहेका छन् ।

काली र पेरेरालगायत सबैभन्दा बढी प्रभावित सहरमा आपत्कालीन टोलीले रातभर र मंगलबारसम्म काम खोजीको काम गरिरहेका छन् । सोमबार देशका नवनिर्वाचित राष्ट्रपति डे ला एस्प्रिएलाले राजधानी बोगोटाबाट २८० किलोमिटर दक्षिण–पश्चिममा अवस्थित कालीमा ३५ जनाको मृत्यु भएको जानकारी दिए ।

कालीमा दर्जनौँ भवन पूर्ण रूपमा ध्वस्त भएका वा खतरनाक रूपमा झुकिरहेका देखिन्थे । बारम्बार आइरहेको परकम्पबिच त्रासका कारण सहरका लगभग २२ लाख मानिसले रात सडकमै बिताएका थिए ।  

सोमबार रातिसम्म नागरिक–सञ्चालित वेबसाइटमा दुई हजार ७०० भन्दा बढी व्यक्ति बेपत्ता भएको रिपोर्ट गरिएको छ । तथापि, वास्तविक बेपत्ताको संख्या धेरै बढी हुन सक्ने आशंका गरिएको छ । मनिजालेस सहरमा एक ऐतिहासिक गिर्जाघर टावरसहित लगभग एक हजार ६०० भवन क्षतिग्रस्त वा नष्ट भएका छन् । 

शुक्रबार नै सत्ता सम्हालेका राष्ट्रपति डे ला एस्प्रिएलाले भग्नावशेषमा फसेका मानिसलाई उद्धार गर्नु सरकारको पहिलो प्राथमिकता भएको बताए । उनले विपत्पछि देशमा आपत्कालीन अवस्थाको घोषणा गरेका छन् ।