- वि.सं २o८२ भदौ १६ सोमबार
नबिल बैंक र निम्बजबिच डेटा ई–सिम र अन्तर्राष्ट्रिय ड्राइभिङ परमिट सेवाका लागि समझदारीपत्रमा हस्ताक्षर भएको छ । यो समझदारीसँगै बैंकका ग्राहकले एनबैंक मोबाइल एपमार्फत विभिन्न मुलुकका लागि डेटा ई–सिम र अन्तर्राष्ट्रिय ड्राइभिङ परमिट सेवा लिन सक्नेछन् । उक्त सम्झौतामा बैंकका नायब प्रमुख कार्यकारी अधिकृत आदर्श बजगाईं र निम्बजका निर्देशक ऋषभ तिमिल्सिनाले सम्झौतापत्रमा हस्ताक्षर गरे ।
यससँगै बैंकको एपमार्फत ग्राहकले चीन, भारत, अमेरिका, अस्ट्रेलिया, दुबई, थाइल्यान्ड, कतार, जापान, कोरिया, इटाली, फ्रान्स, क्यानडालगायत दुई सयभन्दा बढी देश र क्षेत्रका लागि डेटा ई–सिम लिन सक्नेछन् । बैंकका अनुसार विभिन्न देश र क्षेत्रमा भ्रमणमा जाने, विद्यार्थी तथा वैदेशिक रोजगारीमा जानेले बैंकको एपबाटै सम्बन्धित देशको अन्तर्राष्ट्रिय डेटा प्लान खरिद गर्न सक्नेछन् ।
विदेश जानेबित्तिकै इन्टरनेटको समस्या हुने, सिम खरिदका लागि केवाइसी फाराम भर्नुपर्ने र विदेशी मुद्रा बुझाउनुपर्ने बाध्यतालाई मध्यनजर गरी यो सम्झौता गरिएको बजगाईंले बताए । साथै, उनले एपबाटै सजिलै आफूअनुकूलको डेटा प्याकेज खरिद गर्न सकिने जानकारी दिए ।यसका साथसाथै एनबैंक एपबाटै अन्तर्राष्ट्रिय ड्राइभिङ परमिट पनि लिन सकिनेछ । बैंकका अनुसार संयुक्त राष्ट्रसंघको मापदण्डअनुसार तयार हुने उक्त अनुमतिपत्र एक सय ९० भन्दा बढी देशका लागि मान्य हुनेछ ।
