दुई लाख नाघ्यो सुनको भाउ

• अमेरिकी फेडेरल रिजर्भको ब्याजदर घटाउने संकेत, डलरसँग भारतीय रुपैयाँको अवमूल्यन तथा चीन, भारत, टर्कीलगायतले डलरको सट्टा सुन सञ्चितिलाई जोड दिँदा सुनको भाउमा  रेकर्ड

शुक्रबार प्रतितोला दुई लाख ६ सय रुपैयाँमा सुन किनबेच भएको छ । ठुला लगानीकर्ताले सुनमा निरन्तर लगानी वृद्धि गरेका कारण मूल्यमा चाप परेको हो । एक सातामा प्रतितोला ३१ सय मूल्य बढेर सुनको भाउ दुई लाख नाघेको हो । साताको पहिलो दिन आइतबार सुनको भाउ तोलामा एक लाख ९७ हजार पाँच सय रुपैयाँ रहेको थियो ।

अमेरिकाको केन्द्रीय बैंक फेडेरल रिजर्भ (फेड)को बैठक आगामी सेप्टेम्बरमा बस्दै छ । फेडले ब्याजदर कटौती गर्ने अनुमानले बैंकको निक्षेप झिकेर ‘ठुला खेलाडी’ले सुनमा लगानी गरेका कारण मूल्य बढेको सुनचाँदी व्यवसायीको विश्लेषण छ । हाल ४.२५ प्रतिशतदेखि ४.५ प्रतिशतसम्म रहेको नीतिगत दरलाई फेडले आधा प्रतिशत विन्दुले कटौती गर्ने अनुमान अन्तर्राष्ट्रिय सञ्चारमाध्यमले गर्न थालेका छन् । 

अमेरिकी डलरको तुलनामा भारतीय रुपैयाँ कमजोर बन्दै गएकाले पनि सुनको मूल्य महँगिन पुगेको सुनचाँदी व्यवसायी महासंघका पूर्वअध्यक्ष तेजरत्न शाक्यको भनाइ छ । ‘सुनको मूल्य बढ्दै जाँदा सिजनमै माग नगण्य छ । सुनको माग बढ्ने चाड तिज भर्खरै सकियो । दसैँ–तिहार आउँदै छ । तर, सुनको दैनिक माग नगण्य छ । सरकारले विलासिता शुल्क लगाएपछि आन्तरिक बजारमा मूल्य केही बढेको थियो । सुनको भाउ एकदमै महँगो भएको र सर्वसाधारणको क्रयशक्ति नै कमजोर भएकाले सुनको माग बढ्न सकेको छैन ।’ 

अमेरिकी बैंक फेडेरल रिजर्भको ब्याजदर घटाउने संकेत, अमेरिकी डलरसँग भारतीय रुपैयाँ कमजोर रहनु साथै चीन, भारत र टर्कीलगायतका देशहरूले डलर सञ्चितिको सट्टामा सुन सञ्चितिलाई जोड दिँदा सुनको भाउ नेपाली बजारमा उच्च रहन पुगेको महासंघको विज्ञप्तिमा उल्लेख छ ।

भाउ निरन्तर बढ्दा सुनको माग नगण्य छ : तेजरत्न शाक्य, सुनचाँदी व्यवसायी
सुनको मूल्य बढ्दै जाँदा सिजनमै माग नगण्य छ । सुनको माग बढ्ने चाड तिज भर्खरै सकियो । दसैँ–तिहार आउँदै छ । तर, सुनको दैनिक माग नगण्य छ । सरकारले विलासिता शुल्क लगाएपछि आन्तरिक बजारमा मूल्य केही बढेको थियो । सुनको भाउ एकदमै महँगो भएको र सर्वसाधारणको क्रयशक्ति नै कमजोर भएकाले सुनको माग बढ्न सकेको छैन ।

गत वर्ष र अहिलेको साउनमा समान परिमाणमा सुन आयात 
तर, मूल्य बढ्दा ५० करोडको अन्तर
भन्सार विभागका अनुसार साउनमा एक सय किलो सुन आयात भएको छ । यसको मूल्य एक अर्ब ५२ करोड ६३ लाख रुपैयाँ छ । गत वर्ष साउनमा १००.१०२ किलो आयात भएको हो । यो वर्षको तुलनामा बजारभाउ कम भएकाले त्यतिवेला एक अर्ब चार करोड २२ लाख मूल्य परेको थियो । गत आर्थिक वर्ष ०८१/८२ मा कुल एक हजार तीन सय ८९ किलो सुन आयात भएको थियो, जसको मूल्य १७ अर्ब १२ करोड थियो । 

चाँदीको भाउमा पनि नयाँ रेकर्ड
यो साता नेपाली बजारमा चाँदीको मूल्यले पनि नयाँ रेकर्ड बनाएको छ । गत १० साउनमा तोलाको दुई हजार तीन सय ६० रुपैयाँ पुगेर रेकर्ड बनाएको चाँदीको शुक्रबार पनि सोही मूल्य कायम छ । साताको पहिलो दिन आइतबारको तुलनामा भने शुक्रबार चाँदीको मूल्य प्रतितोला १० रुपैयाँ बढेको हो ।