- वि.सं २o८२ श्रावण २५ आइतबार
नेवार समुदायको सांस्कृतिक पर्व हिलेजात्राको अवसरमा संखुवासभाको खाँदबारी र पाँचखपन नगरपालिकाले सार्वजनिक बिदा दिएका छन् ।
नेवार समुदायको बाहुल्य रहेको खाँदबारी र पाँचखपन नगरपालिकाले विज्ञप्ति जारी गर्दै साउन २६ गते सोमबार हिलेजात्रा (रोपाइँ जात्रा)को अवसरमा नगरवासीलाई सार्वजनिक बिदा दिएको हो ।
खाँदबारी नगरपालिकाका मेयर महेश थपलियाले हिलेजात्रा नेवार समुदायको महत्त्वपूर्ण चाड भएको र वर्षौँ अगाडिदेखि मनाउँदै आउने प्रचलन भएकाले सौहार्दपूर्ण ढंगले मनाउन सार्वजनिक बिदा दिएको बताए ।
परम्परागत रूपमा मनाइने यस्ता अमूर्त सम्पदाको संरक्षण गर्न नगरपालिकाले सहयोग गर्नेसमेत मेयर थपलियाको भनाइ छ। जात्राको अवसरमा सोमबार एक दिन नगरभित्रका सम्पूर्ण कार्यालय र शैक्षिक संस्थाहरू बन्द रहने विज्ञप्तिमार्फत जनाइएको छ ।
त्यसैगरी, पाँचखपन नगरपालिकाले विगतका वर्षहरूमा जस्तै हर्षाेल्लासका साथ जात्रा पर्व मनाउन अनुरोध गर्दै सोमबार एक दिन नगरभित्रका सम्पूर्ण कार्यालयहरू, शैक्षिक संस्थाहरू बन्द रहने प्रमुख प्रशासकीय अधिकृत मणिराम खतिवडाद्वारा जारी विज्ञप्तिमार्फत जनाएको छ । जात्राको अवसरमा स्थानीय सरकारले विगतका वर्षहरूदेखि नै सार्वजनिक बिदा दिँदै आएको छ ।
यस वर्ष जात्राको अवसरमा सदरमुकाम खाँदबारीमा ‘जात्रा महोत्सव’ को आयोजना गरिएको छ । राष्ट्रियस्तर विभिन्न कलाकारहरूको साथमा विशेष सांगीतिक कार्यक्रम, हास्य कलाकारहरूको प्रहसन हुने भएको छ । त्यसैगरी पाँचखपन नगरपालिकाको केन्द्र वानामा पनि राष्ट्रियस्तरका विभिन्न कलाकारहरूको उपस्थिति सांगीतिक कार्यक्रम हुने भएको छ ।
