रिलिज भयो प्रिमियरमा रुचाइएको चलचित्र ‘रियाल रिङ्गेट’

नेपाली समाजको समसामयिक र संवेदनशील विषयवस्तुलाई उठान गरेको चलचित्र ‘रियाल रिङ्गेट’ आज शुक्रबारदेखि देशैभर प्रदर्शनमा आएको छ। प्रवासी नेपाली श्रमिकहरूको संघर्ष, पीडा र यथार्थ कथालाई समेटिएको यो चलचित्र प्रिमियरमा रुचाइएको थियो।

यस चलचित्रले देशभर एक सय हाराहारीमा शो प्राप्त गरेको वितरकहरूले जनाएका छन्। प्रिमियरमा दर्शकहरूले चलचित्रको कथा, अभिनय, संगीत र विशेष गरी सामाजिक सन्देशको खुलेर प्रशंसा गरेका थिए। चलचित्रलाई दर्शकले ‘लाखौँ नेपालीहरूको जिन्दगीको ऐना’ भएको प्रतिक्रिया दिएका थिए।

यस चलचित्रले खाडी मुलुकहरूमा रोजगारीको सिलसिलामा गएका नेपालीहरूको जीवन भोगाइलाई पर्दामा उतारेको छ। ‘रियाल रिङ्गेट’को शीर्षकमै कतार, साउदी अरेबिया र मलेसियाको मुद्रा समेटेर प्रवासी जीवनको सांकेतिकता झल्काइएको छ।

चलचित्रको प्रमुख भूमिकामा प्रमोद चौलागाईं र नीता ढुंगाना छन्। छुल्ठिम डोल्मा गुरुङ, रवीन्द्र खड्का, ध्रुव कोइराला, प्रेम सुब्बा, रामचन्द्र अधिकारी, रियर राई, रोशन श्रेष्ठ, ईश्वरी बराल, विमला गिरी, सीमा केसी, सन्दीप तामाङ, सुवास थापामगर, विशाल थापालगायत दर्जनौँ कलाकारको पनि यसमा सशक्त अभिनय छ।

रेबेल फिल्मसको ब्यानरमा गगनलाल प्रधानले निर्माण गरेको तथा विभोर पोखरेलले निर्देशन गरेको यस चलचित्रका लेखक प्रदीप भारद्वाज हुन् भने छायांकन भारत, चितवन, काठमाडौं र लेटाङमा गरिएको हो। द्वन्द्व निर्देशन रोशन श्रेष्ठले, छायांकन हरि घलेले, सम्पादन विपिन मल्लले, ब्याकराउन्ड स्कोर किरण तुलाधरले गरेका छन्।

चलचित्रका गीतमा रामचन्द्र काफ्ले, किरण तुलाधर र चन्दनध्वज केसीको संगीत रहेको छ भने स्वरमा सुगम पोखरेल, केतन क्षेत्री, रामचन्द्र काफ्ले र जुनु रिजाल काफ्लेले आवाज दिएका छन्। गीतका शब्द अमर न्यौपाने, रवि मल्ल, कोसिस क्षेत्री, प्रदीप भारद्वाज र चन्दनध्वज केसीले लेखेका छन्।