एएफसी महिला एसियन कप छनोट : सावित्राको ह्याट्रिकसँगै श्रीलंकाविरुद्ध नेपालको गोल वर्षा 

• पहिलो खेलमा लाओसलाई १०–० ले हराएको नेपालले कमजोर श्रीलंकामाथि ८–० को जित निकाल्यो

कप्तान सावित्रा भण्डारीको ह्याट्रिकको सहयोगमा नेपाली महिला फुटबल टोलीले एएफसी महिला एसियन कप २०२६ छनोट प्रतियोगितामा बुधबार श्रीलंकालाई ८–० को फराकिलो अन्तरले पराजित गरेको छ । उज्वेकिस्तानको राजधानी तास्केन्दस्थित मिली रंगशालामा नेपाललाई लगातार दोस्रो जित दिलाउने डिफेन्डर गीता रानाले दुई गोल गरिन् । यसैगरी, निशा थोकर, रेखा पौडेल र पूजा रानाले समान एक गोल गरेका छन् । यसअघि नेपालले अन्तर्राष्ट्रिय खेलमा नयाँ प्रतिद्वन्द्वी लाओसमाथि १०–० को सानदार जित निकालेको थियो । 

एकपक्षीय खेलमा नेपालले ३४ भन्दा बढी गोल प्रयास गरेको थियो । खेलको ८६औँ मिनेटमा प्रीति राई घाइते हुँदै मैदानबाट बाहिरिइन् । जितसँगै नेपालले समूह ‘एफ’मा ६ अंक बटुलेको छ । समग्रमा नेपालले दुई खेलमा १७ गोल गरेको छ । समूहकै अर्काे खेलमा बलियो उज्वेकिस्तानले पहिलो खेलमा श्रीलंकालाई १०–० ले हराएको थियो । समूहको शीर्ष एक टोलीले आगामी वर्ष अस्ट्रेलियामा आयोजना हुने एसिया कपमा स्थान बनाउनेछ । 

नेपाल र उज्वेकिस्तानमध्ये एक टोलीले एसिया कपमा स्थान बनाउने सम्भावना रहेको छ । अब, समूहको अन्तिम खेलमा नेपालले उज्वेकिस्तानको सामना गर्नेछ । यस खेलको नितिजाले एसिया कपमा स्थान पक्का गर्ने टोलीको टुंगो लाग्नेछ । 

पहिलो हाफमै सावित्राको ह्याट्रिक
कप्तान सावित्राले लगातार खेलमा उत्कृष्ट प्रदर्शन गरी श्रीलंकाविरुद्ध पहिलो हाफमै ह्याट्रिक पूरा गरेकी थिइन् । खेलको सातौँ मिनेटमा गीता रानाले नेपाललाई १–० को अग्रता दिलाइन् । खेलको २०औँ मिनेटमा सावित्राले अनिता बस्नेतको पासमा व्यक्तिगत पहिलो गोल गरिन् । उनले डिबक्सभित्र प्राप्त पासमा वान टचमै गोल गरेकी हुन् । खेलको ४४औँ मिनेटमा उनले व्यक्तिगत दोस्रो गोल गरिन् । यसपटक रश्मिकुमारी घिसिङले दिएको कटब्याकमा सावित्राले नेपाललाई ३–० को स्थितिमा राखिन् । सावित्राले पहिलो हाफको इन्जुरी समयमा ह्याट्रिक पूरा गरिन् । सविता रानामगरको पासमा अनमार्कमा रहेकी सावित्राले सहजै गोल गरिन् । 

पहिलो हाफमा नेपालले ४–० को अग्रता लियो । दोस्रो हाफमा लय नबिगारेको नेपालले थप चार गोल गर्‍यो । खेलको ५४औँ मिनेटमा गीता रानाले पेनाल्टीमा व्यक्तिगत दोस्रो गोल गरिन् । श्रीलंकाकी डिफेन्डर सचिनी सिल्भाले रश्मिकुमारीलाई डिबक्सभित्र लडाएपछि नेपालले पेनाल्टीको अवसर पाएको थियो । गीताले सहजै गोल गरेकी हुन् । खेलको ६२औँ मिनेटमा डिफेन्डर निशा थोकरले छैटौँ गोल गरिन् । 

खेलको ७८औँ मिनेटमा वैकल्पिक खेलाडी रेखा पौडेलले नेपाललाई ७–० को अग्रता दिलाइन् । पूजा रानाले मिलाएको पासमा सिक्स यार्ड बक्समा रेखाले हेडिङ गोल गरेकी हुन् । खेलको ८२औँ मिनेटमा पूजाले नेपालको जित ८–० ले पक्का पारिन् । उनले श्रीलंकन डिफेन्डरको गल्तीमा गोल गरेकी हुन् । 

अञ्जिला दोस्रो खेलमा पनि बेन्चमै
मुख्य प्रशिक्षक प्याट्रिक डी विल्डेले पहिलो खेलमा लाओसविरुद्ध सरु लिम्बूलाई मात्रै परिवर्तन गरेका थिए । सरुको स्थानमा अर्की मिडफिल्डर प्रीति राईले मौका पाएकी थिइन् । पहिलो खेलमा बेन्चमा रहेका रेखा पौडेल र पूजा रानाले श्रीलंकाविरुद्ध पहिलो ११ मा स्थान बनाउन सकेनन् । यस्तै, नियमित गोलरक्षक अञ्जिला तुम्बाप्पो सुब्बाले लगातार दोस्रो खेलमा खेल्ने अवसर पाइनन् । उनको स्थानमा गोलपोस्टको जिम्मा अञ्जना रानामगरले पाइन् । कमजोर प्रतिद्वन्द्वी श्रीलंकाविरुद्ध तेस्रो रोजाइकी गोलरक्षक उषा नाथले मौका पाउने अपेक्षा थियो ।

प्रशिक्षक प्याट्रिकले दोस्रो खेलमा पनि अञ्जनालाई निरन्तरता दिए । प्रशिक्षकले डिफेन्डरमा गीता रानामगरसँगै निशा थोकर र समीक्षा घिमिरेलाई निरन्तरता दिएका थिए । डिफेन्सिभ मिडफिल्डरमा प्रीति र सरस्वती हमालले मौका पाए । मिडफिल्डरमा पूर्वकप्तान रेनुका, सविता रानामगर र अनिता बस्नेत रहे । स्ट्राइकरमा सावित्रालाई रश्मिकुमारीले सहयोग गरेकी थिइन् । 

बंगलादेश पहिलोपटक एसिया कपमा
बंगलादेशको महिला राष्ट्रिय फुटबल टोली पहिलोपटक अर्को वर्ष अस्ट्रेलियामा हुने एएफसी एसिया कपमा छनोट भएको छ । छनोट प्रतियोगिताअन्तर्गत बुधबार समूह ‘सी’मा बहराइन र तुर्किमिनिस्तानबिच २–२ को बराबरी भएपछि बंगलादेशले समूह विजेताका रूपमा एसिया कपमा स्थान सुरक्षित गरेको हो । बंगलादेशले फिफा वरीयतामा आफूभन्दा माथि रहेको म्यानमारलाई हराउँदै एसिया कपमा छनोटल भएको हो । बंगलादेशले म्यानमारलाई २–१ ले स्तब्ध बनायो । बंगलादेशको जितमा रितु पुर्ना चक्माले दुवै गोल गरिन् । फिफा वरीयतामा म्यानमार ५५ र बंगलादेश १२८औँ स्थानमा छन् । 

मुख्य चुनौती पार गर्छौँ : सावित्रा भण्डारी, कप्तान, नेपाल
लगातार दुई खेल जित्दै ६ अंक जोडेका छौँ । हाम्रो मुख्य चुनौती नै उज्वेकिस्तान हो । त्यो चुनौती स्विकार्नुपर्छ । उत्कृष्ट नतिजाका साथ आगामी खेलका लागि खेलाडीहरू उत्सुक छन् । सबै खेलाडीबिचको तालमेल मिलेकाले गोल निस्किरहेको छ । प्रशिक्षणका क्रममा जे–जे सिक्यौँ, त्यो मैदानमा लागू भइरहेको छ । एक किसिमले खेलाडीहरूले आ–आफ्नो स्थानमा प्राप्त ड्युटी पूरा गरेका छन् । सुरुमा सेटपिसबिचको कम्बिनेसनबारे प्रशिक्षण भएको थियो । त्यसपछि कर्नर र फ्रिकिकमा जोड दिइएको थियो । खेलाडीहरूले अर्गनाइज रूपमा खेलिरहेका छन् ।