सुनकोशी नदीमा बाढीको जोखिम हुन सक्ने भन्दै सतर्क रहन प्रशासनको आग्रह

छिमेकी राष्ट्र चीनको तिब्बत क्षेत्रमा अत्यधिक मात्रामा वर्षा हुने हुँदा सुनकोशी नदीमा बाढी आई नदीआसपासका बस्ती जोखिममा पर्न सक्ने भएकाले सतर्क र चनाखो रहन आग्रह गरिएको छ ।  जिल्ला प्रशासन कार्यालय रामेछापका प्रशासकीय अधिकृत प्रकाश प्रधानले बिहीबार एक सूचना जारी गर्दै असार ३ गतेदेखि ७ गतेसम्म चीनको तिव्बत क्षेत्रमा अत्यधिक मात्रामा वर्षा हुने सम्भावना रहेकाले सुनकोशी नदीमा बाढी आई आसपासको बस्ती जोखिममा पर्न सक्ने भन्दै सतर्क रहन आग्रह गरेका हुन् । 

सुनकोशी नदीतटीय क्षेत्रमा पर्ने सुनापति गाउँपालिका, खाँडादेवी गाउँपालिका, मन्थली नगरपालिका र रामेछाप नगरपालिकाको नदी आसपास बाढीको जोखिम हुन सक्ने भएकाले उक्त क्षेत्रमा बसोबास गर्ने नागरिकहरूलाई सतर्कता अपनाउन आग्रह गरिएको हो । 

रामेछापको सुनकोशी किनारमा च्याँयडटार, सिन्धुरेटार, लुभुघाट, खैरनीघाट, कोथपे, बेलघारी, सित्खा, डब्खा, पुछिघाट, नबुघाट, हर्दिनीघाट र भोटटारलगायतको क्षेत्रमा बाक्लो बस्ती रहेको छ । ती सबै बस्तीमा गत वर्षको असोज १० देखि १२ गतेसम्म सुनकोशी नदीमा आएको बाढीले समेत धेरै ठुलो क्षति पुर्‍याएको थियो ।  

चीनको प्रहरी कार्यालयले हिजो नै तिब्बत क्षेत्रमा असार ४ गतेदेखि ७ गतेसम्म अत्यधिक मात्रामा वर्षा हुने भन्दै सार्वजनिक सूचना जारी गरेको थियो । तिब्बतले हिजो नै उक्त सूचना जारी गरेसँगै सिन्धुपाल्चोक, काभ्रे र सिन्धुली जिल्ला प्रशासन कार्यालयहरूले सुनकोशी नदीतटीय क्षेत्रमा बसोबास गर्ने नागरिकहरूलाई सतर्कता अपनाउन अनुरोध गरेका थिए ।