अछाम साँफेबगरको हाटबजारमा भीषण आगलागी, करोडौंको क्षति

अछामको साँफेबगरस्थित हाटबजारमा भीषण आगलागी हुँदा १० वटा पसल जलेर खरानी भएका छन् । शनिबार बिहान ३:४५ बजे विद्युत्को तार सर्ट भएर आगलागी भएको हो । जिल्लाको मुख्य व्यापारिक केन्द्र साँफे हाटबजारस्थित सुभेच्छा मम सेन्टरबाट सुरु भएको आगोले सवा दुई घण्टामै १० वटा पसल जलेर खरानी बनेका थिए ।

जिल्ला प्रहरी कार्यालय अछामका प्रमुख प्रहरी नायव उपरीक्षक ईश्वरी प्रसाद भण्डारीका अनुसार आगलागीका कारण प्रेम खड्काले संचालन गरेको सुभेच्छा मम सेन्टरसहित गंगाबहादुर कुवँरको काल भैरव जनरल स्टोर, मकर कुवँरको रिभर साइड खाजा पसल, टिका कुवँरको ब्यूटी पार्लर, राजेन्द्र कुवँरको डाँक मोवाइल ग्यालरी, दिपक सुनारको काल भैरव सुनचाँदी पसल, भिम कुवँरको रोडसाइड रेष्टुरेन्ट, सुमन कुवँरको ईभी काउन्टर तथा पसल, किशोर भाटको खाजा पसल र स्थानीय सुरेश कुवँरको शीतल होटल एण्ड गेष्ट हाउँस जलेर तीन करोड ८६ लाख ६५ हजारकाे क्षति भएको छ ।

स्थानीयहरुको सहयोगमा सशस्त्र प्रहरी र नेपाल प्रहरीले सवा दुई घण्टापछि आगो नियन्त्रणमा लिएका थिए । दमकल नहुँदा समयमै आगो नियन्त्रणमा लिन नसकेका कारण करोडौंको क्षति भएको हो । अछाममा मंगलसेन नगरपालिकाको मात्रै दमकल छ । उक्त दमकल मर्मतका लागि धनगढी गएको र विकल्पका रुपमा छिमेकी जिल्ला डोटीबाट मगाइएको दमकल ढिलो भएकाले समयमै आगो निभाउन नसकिएको हो । आगलागीले करोडौंको क्षति भएको विवरण संकलन गरिएको छ। गएको चैत्र २६ गते अछामकै बान्नीगढी जयगढ गाउँपालिकास्थित जयगढ बजारमा भएको आगलागीले ३५ पसल जलेर ८ करोड बढीको क्षति भएको थियो ।