अमेरिकासँग व्यापार वार्ता जारी रहेको दाबी आधारहीन : चीन

अमेरिकी राष्ट्रपति डोनाल्ड ट्रम्पले चीनमाथि लगाएको भारी भन्सार महसुल घटाउने सम्झौताको सम्भावनालाई प्रमुखताका साथ उठाएपछि बेइजिङले बिहीबार वासिङ्टनसँग चलिरहेको व्यापार वार्ताको कुनै पनि दाबी ‘आधारहीन’ भएको प्रतिक्रिया दिएको छ।

विश्वका दुई प्रमुख अर्थतन्त्रहरू चिनियाँ सामानहरूमा ट्रम्पको नयाँ भन्सार शुल्कबाट सुरु भएको बढ्दो प्रतिस्पर्धात्मक व्यापार युद्धमा बन्द छन्। धेरै उत्पादनमा भन्सार शुल्क १४५ प्रतिशत पुगेको छ। बेइजिङले संयुक्त राज्य अमेरिकाबाट आयातमा १२५ प्रतिशत नयाँ भन्सार शुल्क लगाएको छ।

ट्रम्पले ‘अनुचित व्यापार अभ्यास’हरूको जवाफी कारबाही र अमेरिकी उत्पादन क्षमता पुनर्स्थापना गर्ने प्रयासका रूपमा उल्लेख गरेको भन्सार महसुलको यो आक्रमणले बजारहरूलाई हल्लाएको छ। यसले  विश्वव्यापी मन्दीको डर बढाएको छ।

दैनिक रूपमा वार्ताहरू भइरहेको ट्रम्पको दाबीलाई बेइजिङले अस्वीकार गरेको छ। ‘विदेशी आर्थिक र व्यापार सम्बन्धका लागि सक्षम विभागका रूपमा म यो कुरामा जोड दिन चाहन्छु कि हाल चीन र संयुक्त राज्य अमेरिकाबिच कुनै आर्थिक र व्यापार वार्ता चलिरहेको छैन,’ चिनियाँ वाणिज्य मन्त्रालयका प्रवक्ता हे याडोङले पत्रकार सम्मेलनमा भने, ‘चीन–अमेरिका आर्थिक र व्यापार वार्ताको प्रगतिबारे कुनै पनि दाबी आधारहीन छ र यसको कुनै तथ्यात्मक आधार छैन, चीनले संयुक्त राज्य अमेरिकालाई आफ्नो गलत अभ्यासहरू सुधार गर्न, वार्ताका लागि आवश्यक इमानदारी देखाउन र समान संवाद र परामर्शको सही मार्गमा फर्कन आग्रह गर्दछ।’

वासिङ्टनले बेइजिङसँग कुरा गरिरहेको छ कि भनेर सोध्दा ‘सबै कुरा सक्रिय छ’ भन्दै ट्रम्पले बुधबार पत्रकारहरूलाई आफ्नो देशले ‘चीनसँग निष्पक्ष सम्झौता’ गर्ने बताएका थिए। व्यापारमा चीनसँग अमेरिकाको प्रत्यक्ष सम्पर्क छ कि भनेर सोधिएको प्रश्नमा ट्रम्पले भनेका थिए, ‘हरेक दिन।’