बागमती प्रदेश सरकार संसद्प्रति गैरजिम्मेवार बनेको प्रतिपक्षको आरोप

बागमती प्रदेशका प्रतिपक्ष दलहरूले सरकार संसद्प्रति गैरजिम्मेवार र असफल साबित भएको दाबी गरेका छन्। प्रदेश सभाको बैठक आह्वान भइरहँदा सरकारले हठात् चालू अधिवेशन अन्त्य गर्नुले सरकार गैरजिम्मेवार र असफल भएको बताएका हुन्।

बुधबार दिउँसो १ बजे प्रदेश सभा आह्वान भएकै अवस्थामा बिहान मन्त्रिपरिषद्को बैठक बसेर चालू अधिवेशन अन्त्यका लागि प्रदेश प्रमुखसमक्ष सिफारिस गरेसँगै प्रतिपक्षी दलहरू आक्रोशित बनेका हुन्। सरकारको सिफारिसमा प्रदेश प्रमुखले चालू अधिवेशन बुधबार रातिबाट लागू हुने गरी अन्त्य गरिसकेका छन्।

बुधबार प्रदेश सभा सचिवालय हेटौँडामा पत्रकार सम्मेलन गर्दै प्रतिपक्षी दलहरू माओवादी केन्द्र, एकीकृत समाजवादी र राप्रपाले सरकारले संसद् छलेर निरंकुश शैली देखाएको आरोप लगाए। सरकार संसद्प्रति गैरजिम्मेवार बनेको बताउँदै आफ्नो कमीकमजोरी र असफलतालाई ढाकछोप गर्न संसद् छलेको टिप्पणी गरे।

मााओवादी केन्द्र बागमती प्रदेश संसदीय दलका प्रमुख सचेतक रत्नप्रसाद ढकालले सरकारको प्रवृत्तिले सरकार र प्रतिपक्ष दलबिच द्वन्द्वको स्थिति निम्तिन सक्ने सम्भावना देखिएको बताए। ‘सरकारले हठात् अधिवेशन अन्त्य गर्ने निर्णय गरेको छ। सरकार प्रदेश सभाबाट भागेर गैरजिम्मेवार ढंगबाट प्रस्तुत भएको छ,’ उनले भने, ‘दलहरूबिच छलफल चलिरहँदा अधिवेशन अन्त्य गर्ने निर्णयले सरकारको अपरिपक्व दम्भ र निरंकुश शैली उदांगिएको छ।’

सरकारको उक्त निर्णयले कार्यपालिका र व्यवस्थापिकाबिचको दूरी बढाउने काम गरेको उनको भनाइ छ। प्रदेश सभामा प्रतिनिधित्व गर्ने सबै राजनीतिक दलहरूबिच भएको सहमति गत असोजको ११-१२ गतेको अविरल वर्षापछि राहात उद्धार र पुनर्निर्माण विषय आलटाल गर्ने काम गरेको उनले बताए।

उनका अनुसार सरकारका कारणले आगामी बजेट अधिवेशन पनि अनिश्चित दिशामा धकेलिने सम्भावन बढेको छ। दलहरूबिचको सहमति र सहकार्यबाट भाग्ने सरकारले नीति, कार्यक्रम र बजेटसमेत ल्याउने नैतिकता गुमाएको उनले बताए। गैरजिम्मेवार हर्कत छोडेर वार्ता र सहमतिमार्फत अगाडि बढ्न उनले सरकारसँग माग गरेका छन्।