बागमती प्रदेश सभाको आजको बैठक सूचना टाँसेर स्थगित

बागमती प्रदेश सभाको बुधबारका लागि बोलाइएको बैठक सूचना टाँस गरेर स्थगित गरिएको छ। दिउँसो १ बजेका लागि बोलाइएको बैठक बस्न नसकेपछि सूचना टाँस गरेर अर्को सूचना जारी नभएसम्मका लागि स्थगित गरिएको संसद् सचिवालयले जनाएको छ।

प्रदेश सभा सचिवालयका अनुसार प्रदेश सभाको बैठक बस्ने अवस्था नदेखिएपछि सभामुख भुवनकुमार पाठकको निर्देशनअनुसार अर्को सूचना नभएसम्मका लागि स्थगित गरिएको हो। सचिवालयका प्रवक्ता मनोजकुमार गुप्ताले प्रदेश सभा सञ्चालनको अवस्था नरहेकाले प्रदेश सभा नियमावली, २०७४ को नियम ६ को उपनियम २ बमोजिम बैठक स्थगित गरिएको जानकारी दिए।

प्रदेश सभा सञ्चालनका लागि मंगलबार दिनभर बसेको सर्वदलीय बैठकमा सत्तापक्ष र प्रतिपक्ष दलहरूबिच सहमति जुट्न नसक्दा प्रदेश सभा बैठक प्रभावित हुँदै आएको थियो। सत्तापक्ष र विपक्षी दलहरूबिच विगतमा भएको सहमति कार्यान्वयनको विषय टुंग्याउन नसक्दा प्रदेश सभा बैठक दुईपटक समय तोकिए पनि बस्न सकेन।

विशेषगरी बजेटमाथिको विवादका कारण सत्तापक्ष र प्रतिपक्ष दलबिच विवाद हुँदै आएको थियो। मंगलबार दिउँसो १ बजेका लागि बोलाइएको बैठकमा पनि उक्त विषयमा सहमति जुट्न नसकेपछि अपराह्न ४ बजेसम्मका लागि बैठक सारिएको थियो। अपराह्न ४ बजेका लागि बोलाइएको बैठक पनि चल्न नसकेपछि सूचना टाँसेर बुधबार दिउँसो १ बजेसम्मका लागि स्थगित गरिएको थियो।

प्रदेश सरकारको सिफारिसमा प्रदेश प्रमुख दीपकप्रसाद देवकोटाले चालू हिउँदे अधिवेशन आज राति ११ः५९ बजेबाट लागू हुने गरी अन्त्य गरिसकेका छन्।