- वि.सं २o८१ चैत २० बुधबार
ओखलढुंगाको लिखु गाउँपालिकामा अवस्थित तीन विद्यालयका विद्यार्थीलाई शैक्षिक सामग्री, खेलकुद सामग्री र पोसाक वितरण वितरण गरिएको छ।
स्विट्जरल्यान्डमा बस्दै आएका जनार्दन गौतमले जेजी फाउन्डेसन नामक संस्थामार्फत कालिका आधारभूत विद्यालय मजुवा, बडडाँडा आधारभूत विद्यालय घुर्बिसे र गणेश आधारभूत विद्यालयका विद्यार्थीलाई यी सामग्री वितरण गरेका हुन्। गौतम उक्त संस्थाका संस्थापक हुन्।
विकट गाउँको विद्यालयको अवस्था देखेर सानो भए पनि आफूले सक्दो सहयोग गरेको उनको भनाइ छ। सानै भए पनि आफ्नो सहयोगलाई हार्दिकतापूर्वक स्वीकार गरेकोमा विद्यालय प्रशासनलाई धन्यवाद दिँदै गौतमले आगामी दिनहरूमा विद्यालयको आवश्यकताअनुसार सहयोग गर्ने आश्वासन दिए।
दुर्गम तथा पहुँच नभएका ठाउँहरूमा सामाजिक कार्य गर्ने उद्देश्यले आफ्नो व्यक्तिगत खर्च कटौती गरेर तथा साथीहरूले दिएको रकमबाट यस्ता कार्य गर्दै आएका छन्। जेजे फाउन्डेसनले यसअघि स्वास्थ्य शिविर, विद्यालय भवन निर्माण, सामाजिक सचेतनालगायतका कार्यक्रमहरू पनि गरेको छ।
