Skip This
त्रिदेशीय महिला टी–२० अन्तर्राष्ट्रिय क्रिकेट श्रृंखलामा नेपालले लगातार दोस्रो हार व्यहोर्नुपरेको छ।
आज (शनिबार) को दोस्रो खेलमा नेपाल थाइल्यान्डसँग ४ विकेटले पराजित भएको हो। नेपालले दिएको १०२ रनको लक्ष्य थाइल्यान्डले ६ बलअघि नै ६ विकेट गुमाएर भेटायो। थाइल्यान्डकी नान्नापट कोन्चारेनकाईले नटआउट ६० रन बनाइन्। नेपालकी मनीष उपाध्यायले २ विकेट लिइन्।
यसअघि त्रिवि क्रिकेट मैदानमा टस जितेर ब्याटिङ गरेको नेपालले २० ओभरमा ९ विकेट गुमाएर १०१ रन बनायो। नेपालका विन्दु रावल र कविता कुँवरले समान २५ रन बनाए। थाइल्यान्डकी थिपचा पुत्थावोङले ३ विकेट लिइन्।
नेपाल पहिलो खेलमा नेदरल्यान्डसँग २० रनले पराजित भएको थियो। थाइल्यान्डको भने यो लगातार दोस्रो जित हो। थाइल्यान्डले पहिलो खेलमा नेदरल्यान्डसलाई ८ विकेटले हराएको थियो। प्रतियोगितामा भोलि नेपाल र नेदरल्यान्डसबिच खेल हुनेछ। लिग चरणमा शीर्ष रहने टोलीले उपाधि जित्नेछ।
