- वि.सं २o८१ माघ १६ बुधबार
नयाँ पत्रिकाका मकवानपुर संवाददाता पोष्टराज अधिकारी कैलाश गाउँपालिकाबाट सम्मानित भएका छन्।
अति सीमान्तकृत चेपाङ तथा विपन्न तामाङ समुदायको बाहुल्य रहेको गाउँपालिकाका दूरदराजका बस्तीहरूको सूचना, समाचार र जानकारी स्थानीय तथा राष्ट्रिय सञ्चारमाध्यमहरूमार्फत प्रकाशन–प्रसारण गरी सूचना तथा सञ्चार क्षेत्रमा महत्त्वपूर्ण योगदान पुर्याएको भन्दै गाउँपालिकाले सम्मान गरेको हो।
मंगलबार बसेको गाउँपालिकाको १५औँ गाउँसभामा अधिकारीलाई नगदसहित सम्मान गरियो। उनलाई गाउँपालिकाका अध्यक्ष लोक मुक्तान, उपाध्यक्ष बालकुमार मल्ललगायतले नगद पाँच हजार रुपैयाँ र प्रशंसा–पत्रसहित सम्मान गरेका हुन्।
गाउँपालिकाले गाउँसभाको अवसरमा महिला उद्यमी, उपभोक्ता समिति, प्राविधिक कर्मचारी, शिक्षक, विद्यार्थीलगायत दुई दर्जनभन्दा बढी व्यक्ति तथा संस्थालाई सम्मान गरेको छ।
