- वि.सं २o८१ माघ १५ मंगलबार
मदन भण्डारी लोकमार्गको उदयपुरको उदयपुरगढी गाउँपालिका–७ को अँधेरी जोगीटोल खण्डमा पर्ने कल्भर्टमा एक पुरुषको शव फेला परेको छ।
जिल्ला प्रहरी कार्यालय उदयपुरका सूचना अधिकारी डिएसपी राजन चापागाईंका अनुसार उदयपुरगढी गाउँपालिका–७ घलेडाँडाका ४६ वर्षीय नयन्द्रबहादुर घलेमगरको शव भेटिएको हो।
मृतक मगरको शव कल्भर्टमुनि भेटिएको डिएसपी चपागाईंको भनाइ छ। उनले भने, ‘आज (मंगलबार) बिहान शव भेटिएको थियो। परिवारले आशंका गरेकाले तालिम प्राप्त कुकुर ल्याएर अनुसन्धान गरिरहेका छौँ।’ परिवारले नै तालिम प्राप्त कुकुरबाट अनुसन्धान गर्न माग गरेकाले शव उठाएका छैनौँ।’
उनले घटना शंकास्पदजस्तो देखिएकाले प्रहरीले सूक्ष्म अनुसन्धान गरिरहेको जानकारी दिँदै पोस्टमार्टमपछि मात्र विस्तृत रूपमा बताउन सकिने बताए।
