- वि.सं २o८१ पौष ७ आइतबार
मकवानपुर प्रहरीले आठ ग्राम ५५० मिलिग्राम लागुऔषध खैरो हेरोइनसहित आइतबार दुई युवालाई पक्राउ गरेको छ। पक्राउ पर्नेमा हेटौँडा–१ का २७ वर्षीय सनिप भोम्जन र हेटौँडा–२ बस्ने २१ वर्षीय विशाल क्षेत्री रहेका छन्।
जिल्ला प्रहरी कार्यालय मकवानपुरका प्रहरी निरीक्षक ठाकुरप्रसाद सापकोटाका अनुसार प्रहरीले रातोमाटे चेकपोस्टस्थित पूर्व-पश्चिम सडकखण्डमा पथलैयाबाट हेटौँडा बजारतर्फ आउँदै गरेको ना३५प ५८११ नम्बरको मोटरसाइकल रोकेर खानतलासी गर्दा उक्त मोटरसाइकलमा सवार भोम्जन र क्षेत्रीलाई लागुऔषध खैरो हेरोइनसहित पक्राउ गरिएको हो।
प्रहरीले खानतलासी गर्दा मोटरसाइकलको साइड लाइटभित्र लुकाइछिपाई ल्याएको अवस्थामा आठ ग्राम ५५० मिलिग्राम लागुऔषध खैरो हेरोइन फेला परेको प्रहरी निरीक्षक सापकोटाले जानकारी दिए। भोम्जन र क्षेत्रीलाई नियन्त्रणमा लिई मकवानपुर जिल्ला अदालतबाट १५ दिनको म्याद थप गरी अनुसन्धान थालिएको सापकोटाले बताए।
