- वि.सं २o८१ पौष १ सोमबार
गुल्मीको इस्मामा एक महिला मृत अवस्थामा फेला परेकी छिन् । इस्मा गाउँपालिका-४ हुलकी ५० वर्षीया मिना दर्लामी आफ्नै घरमा मृत फेला परेको स्थानीय भोला सिँह थापाले जानकारी दिए ।
मृतक दर्लामीको शरीरभरि चोट र रगत रहेको थापाले बताए । घरमा श्रीमान् शिव बहादुर दर्लामी र मिना बस्दै आएका थिए । उनले आइतबार राती ९/१० बजेको घटना हुनसक्ने बताए ।
घटनास्थलमा शवको अवस्था हेर्दा हत्या भएको हुनसक्ने स्थानीयले अनुमान गरेका छन् । घटनास्थलमा जिल्ला प्रहरी कार्यालय गुल्मीको टोली गइरहेकोले घटनाको मुचुल्कापछि थप अनुसन्धान हुने जिल्ला प्रहरी कार्यालय गुल्मीका निमित्त कार्यालय प्रमुख प्रहरी नायब उपरीक्षक शंकर पोख्रेलले जानकारी दिए ।
