- वि.सं २o८१ मङ्सिर १३ बिहीबार
जाजरकोटमा अज्ञात समूहले एमाले उम्मेदवार चढेको गाडीमा आक्रमण गरेका छन्। बिहीबार नलगाड नगरपालिका–१, चिउरीमा उनी चढेकाे गाडीमा ढुंगा प्रहार भएकाे हाे।
एमालेको तर्फबाट नगरपालिका उपमेयरकी उम्मेदवार सुनिता बोहरा चढेको गाडीमा आक्रमण गरेको एमालेका केन्द्रीय सदस्य चन्द्रप्रकाश घर्तीले बताए। नलगाड नगरपालिका दल्लीबाट नलगाड–१, चिउरीतर्फ जाँदै गरेको लु२च ६२२४ नम्बरको गाडीमा आक्रमण भएको उनको भनाइ छ। ढुंगा प्रहारबाट जिपमा सामान्य क्षति पुगेको र आक्रमणकारी समूह भागेको उनीहरूको भनाइ छ।
चुनावी प्रचारमा हिँडेको जिपमाथि नलगाड–१, सिमपानी भन्ने ठाउँमा ढुंगा प्रहार भएको हो। घटनाबारे जिल्ला प्रहरी जाजरकोटलाई खबर गरिएको उम्मेदवार सुनिता बोहराले बताइन्। गाडीमा एमाले पोलिटब्युरो सदस्य भैरवसुन्दर श्रेष्ठ, एमालेका केन्द्रीय सदस्य चन्द्रप्रकाश घर्ती, नलगाड नगरपालिका उपमेयर पदकी उम्मेदवार सुनिता बोहरा, अनेरास्ववियुका केन्द्रीय उपाध्यक्ष नारायण घर्ती, प्रेस चौतारी जाजरकोटका अध्यक्ष विनोदकुमार घर्ती सवार थिए। गाडीको अघिल्लो भागमा क्षति भएको जिल्ला प्रहरी कार्यालय जाजरकोटका प्रहरी प्रमुख पुरुषोत्तम पाण्डेले बताए।
