नेपालको आर्थिक वृद्धि ४.९ प्रतिशत हुने एसियाली विकास बैंकको अनुमान

नेपालले सन् २०२५ (आर्थिक वर्ष ०८१/८२) मा ४.९ प्रतिशत आर्थिक वृद्धिदर हासिल गर्ने एसियाली विकास बैंकले अनुमान गरेको छ। 

बुधबार काठमाडौंमा आयोजित कार्यक्रममा ‘एसियन डेभलपमेन्ट आउटलुक २०२४’ सार्वजनिक गर्दै बैंकले यस्तो अनुमान प्रस्तुत गरेको हो। 

आर्थिक वर्ष २०२३ मा कुल गार्हस्थ उत्पादन (जिडिपी) वृद्धि दर २.०% थियो, जसले अर्थतन्त्र सुस्त गतिमा रहेको 6देखाएको थियो। एडिबीअनुसार गत आर्थिक सन् २०२४ मा जिडिपी ३.९% ले वृद्धि हुने र सन् २०२५ मा वृद्धिदर ४.९% पुग्ने अपेक्षा छ। 

यो वृद्धिमा घरेलु मागको वृद्धि र पूर्वाधारमा भएको लगानीको योगदान प्रमुख रहेको बैंकले जनाएको छ। २०२४ को अन्त्यसम्ममा मुद्रास्फीति घटेर ५.४% पुग्ने र २०२५ मा स्थिर हुँदै ५.५% मा रहने अपेक्षा गरिएको बैंकले जनाएको छ। 

यसले महामारीपूर्वको स्तरभन्दा माथि भए पनि मुद्रास्फीति केही घट्ने संकेत गरेको एडिबीको विश्लेषण छ। आर्थिक वर्ष २०२३ मा मुद्रास्फीति ७.७% मा थियो, जसले मूल्य वृद्धि दबाबलाई जनाउँछ। 

आर्थिक वर्ष २०२३ मा चालू खाता सन्तुलन जिडिपीको –१.४% मा ऋणात्मक थियो। व्यापार घाटामा भएको वृद्धिले चालू खाता घाटा चुलिएको थियो। आर्थिक वर्ष २०२४ मा यो उल्लेखनीय रूपमा सुधार भई जिडिपीको ३.९% ले सकारात्मक हुने अपेक्षा गरिएको छ, जसले बाह्य सन्तुलनमा सुधारको संकेत गर्दछ। यद्यपि, आर्थिक वर्ष २०२५ मा यो पुनः घटेर –०.४% पुग्ने अनुमान छ।

एडिबीले औँल्याएका जोखिमहरूः
– विश्व अर्थतन्त्रमा सम्भावित मन्दी
– मध्यपूर्वमा बढ्दो भू–राजनीतिक तनाव
– सार्वजनिक परियोजनाहरूको कार्यान्वयनमा ढिलाइ
– राजनीतिक अस्थिरता
– प्राकृतिक प्रकोप र विपत्

आर्थिक वर्ष ०८१/८२ : सन् २०२५
आर्थिक वर्ष ०८०/८१ : सन् २०२४
आर्थिक वर्ष ०७९/८० : सन् २०२३