![](https://nayapatrika.blr1.cdn.digitaloceanspaces.com/news/images/IMG_1381.2024-07-04-08-45-14.jpeg)
पछिल्लो पाँच दिनदेखि सक्रिय रहेको मनसुनी प्रणाली आगामी आइतबारसम्म सक्रिय अवस्थामा नै रहने भएको छ ।
मौसम पूर्वानुमान महाशाखाका अनुसार न्यूनचापीय रेखा नेपालको दक्षिण भूभाग/सिमाना आसपास नै रहने र मनसुन अझ सक्रिय हुने सम्भावना भएकाले आइतबारसम्म सतर्कता अपनाउनुपर्ने देखिन्छ ।
महाशाखाले धेरै वर्षा हुने आकलन गरिएका लुम्बिनी, गण्डकी, कर्णाली र सुदूरपश्चिम प्रदेशका ३० जिल्लामा रेडअलर्ट जारी गरेको छ ।
शुक्रबारदेखि आइतबारसम्म पनि देशका अधिकांश स्थानमा हल्कादेखि मध्यम वर्षाको सम्भावना रहेको छ । कोशी, मधेश, बागमतीका थोरै स्थानमा भीषण (भारी) वर्षाको आकलन गरिएको छ ।
त्यस्तै, गण्डकी, लुम्बिनी, कर्णाली र सुदूरपश्चिमका केही स्थानमा भारीदेखि धेरै भारी वर्षा तथा थोरै स्थानमा अति भारी वर्षाको चेतावनी दिइएको छ ।
आइतबारसम्म भू–क्षय, पहिरो तथा गेग्रान बहाव को जोखिम रहेको, सहरी तथा तराई क्षेत्रमा डुबानको जोखिम रहेको महाशाखाले जनाएको छ ।
यसअघि महाशाखाले १७ असारदेखि २० असारसम्मका लागि मनसुनी बुलेटिन जारी गरेको थियो ।
रेडअलर्ट जारी भएका ३० जिल्ला
मौसम पूर्वानुमान महाशाखाले लुम्बिनी, गण्डकी, कर्णाली र सुदूरपश्चि प्रदेशका ३० जिल्लामा रेडअलर्ट जारी गरेको छ ।
गण्डकीका म्याग्दी, बाग्लुङ, कास्की, पवर्त, स्याङ्जा, तनहुँ, नवलपरासी पूर्व र मुस्ताङमा धेरै वर्षा हुने देखिएको छ । धेरै वर्षा हुने भएकाले यस क्षेत्रमा पहिरोको जोखिम छ ।
त्यस्तै, लुम्बिनीका कपिलवस्तु, रुपन्देही, पाल्पा, अर्घाखाँची, गुल्मी, प्युठान, नवलपरासी पश्चिम, रोल्पा र रुकुम पूर्वलाई रेडअलर्टमा राखिएको छ ।
कर्णालीका जाजरकोट, दैलेख, रुकुम पश्चिम, कालीकोट, जुम्ला र हुम्ला रेडअलर्टमा छन् । त्यस्तै, सुदूरपश्चिमका दार्चुला,बैतडी, बझाङ, बाजुरा, डडेल्धुरा, डोटी र अछामलाई रेडअलर्टमा राखिएको छ ।
यी क्षेत्रमा आगामी आइतबारसम्म धेरै वर्षा हुने भएकाले विपतको जोखिम पनि बढेको हो ।