सातौँ संस्करणको स्केटिङ तथा स्केटबोर्डिङ च्याम्पियनसिप प्रतियोगिता २०८१ शनिबार राति सम्पन्न भएको छ। काठमाडौंको टोखा नगरपालिकामा आयोजना भएको प्रतियोगितामा विजयीलाई पुरस्कार, मेडल र प्रमाणपत्र दिइएको छ।
प्रतियोगितामा महिला खुला च्याम्पियनसिपतर्फ खुसी विके प्रथम, समीक्षा राई दोस्रो, लेमंग मगर तेस्रो भए। पुरुष जुनियरतर्फको खुला च्याम्पियनसिपमा किरण लामा गुरुङ प्रथम, यमबहादुर कामु दोस्रो र अविशेष परिवार तेस्रो भएका छन्।
आयोजक नेपाल स्केटिङ तथा स्केटबोर्डिङ संघका सत्य थापाका अनुसार सिनियर पुरुष च्याम्पियनसिपतर्फ वसन्त राई प्रथम, शरद राई दोस्रो र पेन्थलिन शेर्पा तेस्रो भए। सबै विधामा प्रथम हुनेलाई २५ हजार रुपैयाँ, दोस्रोलाई १५ हजार र तेस्रोलाई १० हजार रुपैयाँ पुरस्कार प्रदान गरिएको छ।
दुई दिनसम्म सञ्चालन भएको प्रतियोगितामा १८० जुनियर तथा सिनियर पुरुष र ७० जुनियर तथा सिनियर महिला खेलाडी सहभागी थिए। ती खेलाडीलाई खुला सिनियर पुरुष, खुला जुनियर पुरुष, खुला महिला स्केटिङ च्याम्पियनसिप गरेर तीनवटा विधमा खेलाइएकोे थियो ।
प्रतियोगिता आयोजना गर्न राष्ट्रिय खेलकुद परिषद्ले सहयोग गरेको थियो।