आगामी आर्थिक वर्ष ०८१/८२ को बजेटको सीमा पुनरावलोकन गर्न सोमबार राष्ट्रिय स्रोत अनुमान समितिको बैठक बस्ने भएको छ।
यसअघि कायम बजेटको १८ खर्ब रुपैयाँसम्मको सिलिङ (सीमा)लाई पुनरावलोकन गर्न अपराह्न ४ बजे बैठक बस्न लागेको राष्ट्रिय योजना आयोग स्रोतले जनाएको छ।
राष्ट्रिय स्रोत अनुमान समितिले स्रोतको अनुमान गर्दाको अवस्थाभन्दा बजेट तर्जुमाको अवस्थामा फरक परिस्थिति सिर्जना भएमा स्रोत र खर्चको सीमा पुनरावलोकन गर्न सक्ने व्यवस्था छ।
आयोगको उपाध्यक्षको अध्यक्षता रहेको यो समितिमा अर्थसचिव सदस्य रहने व्यवस्था छ। समितिले संघीय सरकार, प्रदेश र स्थानीय तहको खर्च, राजस्व, वैदेशिक सहायता र आन्तरिक ऋण परिचालनको वर्तमान अवस्था, बजेट कार्यान्वयनको समीक्षा गरी उपलब्ध हुन सक्ने स्रोतको आकलन गर्छ।
त्यस्तै, आवधिक योजना, मध्यमकालीन खर्च संरचना र सरकारको नीति तथा कार्यक्रमको आधारमा आगामी तीन आर्थिक वर्षको खर्चको आवश्यकता आकलन गर्छ।