सप्तरंग डिजिटल संस्करण

भेनिसमा दुई अवार्ड जितेको ‘द रेड सुटकेस’को टिजर सार्वजनिक

भेनिस फिल्म फेस्टिभलमा दुई अवार्ड जित्न सफल ‘द रेड सुटकेस’को टिजर सार्वजनिक भएको छ। प्रदर्शनको मिति नजिकिँदै गर्दा सोमबार निर्माण संस्था आइसफल प्लसको युट्युब च्यानलबाट टिजर रिलिज गरिएको हो।

यो चलचित्र नयाँ वर्ष २०८१ को अवसरमा यही ३० चैतबाट रिलिज हुँदै छ। निर्माण टिमले चलचित्रको कथा र कथावाचनको शैली प्रस्तुत गर्ने गरी टिजर सार्वजनिक गरेको छ।

मिथक, नेपालको आप्रवासी परम्परा र नियतिलाई पृष्ठभूमिमा राखेर कथावाचन गरिएको फिल्म फिडेल देवकोटाको लेखन तथा निर्देशनमा तयार भएको हो।

टिजरमा छायांकन, ध्वनि र रङको गज्जबको सम्मिश्रण देख्न सकिन्छ। टिजरले मिथक र यथार्थको कोलाजमा नेपालको आप्रवासी परम्परालाई प्रस्तुत गर्ने संकेत गरेको छ। सौगात मल्ल, विपिन कार्की र सृष्टि श्रेष्ठको अभिनय रहेको फिल्ममा अभिनेता प्रवीण खतिवडा रोचक भूमिकामा छन्। टिजरमा उनै प्रवीण मात्र अटाएका छन्।

निर्माण टिमले टिजरमा कलाकारको अनुहारलाई भन्दा फिल्मको कथालाई हाइलाइट गर्ने प्रयास गरेको जनाएको छ। निर्देशक फिडेल देवकोटाले कथा र कथा भन्ने तरिका आफ्नो लागि महत्त्वपूर्ण भएको बताउँदै सोहीअनुसार टिजर तयार गरेको प्रतिक्रिया दिए।

आइसफल प्रोडक्सनका लागि रामकृष्ण पोखरेलले निर्माण गरेको फिल्मलाई सुशन प्रजापतिले खिचेका हुन्। फिल्म समन अलभितिगाले सम्पादन गरेका छन्। श्रीलंकामा प्राविधिक काम गरिएको फिल्ममा शोभा थापा निर्माता र श्रीलंकाकै विमुक्ति जयसुन्दरा सहनिर्माताको रूपमा रहेका छन्।

गत वर्षको सेप्टेम्बरमा भेनिसमा वर्ल्ड प्रिमियर भएको फिल्मले त्यही फेस्टिभलमा महत्त्वपूर्ण दुई अवार्ड जितेको थियो। त्यसयता चलचित्र संसारकै पुरानोमध्ये एक मानिने जर्मनीको म्यानहाइम हाइडेलवर्ग इन्टरनेसनल फिल्म फेस्टिभल, स्विट्जरल्यान्डको जुरिच फिल्म फेस्टिभल, भारतको मुम्बई फिल्म फेस्टिभल आदि फेस्टिभलमा प्रदर्शन गरिएको थियो।

चलचित्रले भेनिसमा फन्डापजियोनी फाई पर्सना लाभारो एम्बिएन्टेजमा अनरेबल मेन्सन अवार्ड पाएको थियो भने स्वतन्त्र समीक्षकहरूको संस्था बिसाटो डिओरोले डेब्यु फिल्म निर्देशकको रूपमा निर्देशक फिडेल देवकोटालाई बेस्ट फस्ट फिचर फिल्मको अवार्ड प्रदान गरेको थियो। फिल्मले श्रीलंकामा सम्पन्न जाफ्ना इन्टरनेसनल सिनेमा फेस्टिभलमा पनि बेस्ट डेब्यु फिचर फिल्मको अवार्ड जितेको छ।