खेलकुद प्रिन्ट संस्करण

नेपाल एनपिजिए टुर च्याम्पियनसिप आजदेखि

नाडीमा लागेको चोटका कारण नेपाल नम्बर एक प्रोफेसनल गल्फर शुक्रबहादुर राईले प्रतियोगिता गुमाए

सूर्य नेपाल गल्फ टुर २०२३–२४ अन्तर्गत छैटौँ सूर्य नेपाल एनपिजिए टुर च्याम्पियनसिप सोमबारदेखि गोकर्ण गल्फ क्लबमा सुरू हुँदै छ । चार दिनसम्म चल्ने ७२ होलको प्रतियोगिता बिहीबार सकिनेछ । ८ लाख ४० हजार पुरस्कार राशि रहेको प्रतियोगितामा ३३ प्रोफेसनल र १२ एमेच्योर गल्फरले उपाधिका लागि दाबेदारी प्रस्तुत गर्नेछन् । च्याम्पियनसिप विजेताले १ लाख ४० हजार पुरस्कार प्राप्त गर्नेछन् । उपविजेताले ९० हजार र तेस्रो हुने गल्फरले ६७ हजार रुपैयाँ हात पार्नेछन् । 

३६ होलको समाप्तिमा कट लागू हुनेछ । त्यसपछि उत्कृष्ट २१ खेलाडीले तेस्रो र चौथो दिनका लागि स्थान सुरक्षित गर्नेछन् । एमेच्योर खेलाडीको हकमा पनि कट बनाउन उत्कृष्ट २१ भित्र पर्नुपर्ने नियम रहेको छ । कट बनाउन सफल सबै प्रोफेसनल खेलाडीले पुरस्कार प्राप्त गर्नेछन् । ३३ प्रोफेसनल गल्फरमध्ये भुवन नगरकोटी, रवि खड्का, दिनेश प्रजापति, धन थापा र सञ्जय लामाबीच उपाधिका लागि कडा प्रतिस्पर्धा हुने सम्भावना छ । 

प्रोफेसनल गल्फरलाई यसपटक पनि टप एमेच्योर सद्भाव आचार्यले कडा चुनौती दिनेछन् । राहुल विश्वकर्मा र टासी छिरिङले पनि प्रो गल्फरलाई माथ दिने प्रदर्शन गर्न सक्ने सम्भावना रहेको छ । नेपाल नम्बर एक प्रोफेसनल गल्फर शुक्रबहादुर राईले चोटका कारण प्रतियोगिता गुमाएका छन् । नाडीमा लागेको चोटले गर्दा उनले यो प्रतियोगिताबाट नाम फिर्ता लिएको आयोजकले जनाएको छ । 

अर्का प्रोफेसनल सुवास तामाङले कोलकाता च्यालेन्जमा कट बनाउन नसकेपछि उनी तरुण सरदेसाई एकेडेमीमा प्रशिक्षणका लागि फर्किएका छन् । एनपिजिएका अध्यक्ष रवीन्द्रमान श्रेष्ठले सूर्य नेपाल टुरमा गल्फको स्तर बढ्दै गएको र यो सिजन प्रो र एमेच्योर खेलाडीको प्रदर्शन उत्साहजनक रहेको बताए ।