उपप्रधानमन्त्री तथा गृहमन्त्री रवि लामिछानेले बाँसबारी छालाजुत्ता कारखानाको हडपिएको १० रोपनी जग्गा सम्बन्धमा अनुन्धान प्रक्रिया अघि बढाउन निर्देशन दिएका छन् । गृहमन्त्री लामिछानेले गृहसचिव एकनारायण अर्याल, नेपाल प्रहरीका आइजिपी वसन्त कुँवर र केन्द्रीय अनुसन्धान ब्युरो (सिआइबी)का निर्देशक एआइजी श्यामलाल ज्ञवालीलाई आइतबार मन्त्रालय बोलाएर निर्देशन दिएका हुन् ।
सिआइबी प्रमुख ज्ञवालीले छालाजुत्ता कारखानाको हडपिएको जग्गा सम्बन्धमा अनुसन्धान जारी रहेको र सोही प्रक्रियामा गृहमन्त्री लामिछानेको चासो रहेको बताए ।
गृहस्रोतका अनुसार गृहमन्त्री लामिछानेले उद्योगपति विनोद चौधरीविरुद्ध पनि छानबिन गर्न निर्देशन दिएका छन् । ‘छालाजुत्ता कारखानाको जग्गा हडपिएको छ । यसको अनुसन्धान प्रक्रिया तत्काल अघि बढाउनुहोस् । दोषी देखिए विनोद चौधरीलाई पनि अनुसन्धान प्रक्रियामा सामेल गराउनुहोस्,’ गृहमन्त्री लामिछानेको भनाइ थियो ।