बुटवल उपमहानगरपालिका स्थानीय आर्थिक विकासमा देशकै सर्वोत्कृष्ट घोषित भएको छ । । नेपाल नगरपालिका संघद्वारा मंगलबार आयोजित समारोहमा आर्थिक वर्ष ०७९/८० मा देशभरका स्थानीय तहमध्ये बुटवल सर्वोत्कृष्ट भई ‘म्युनिसिपल एक्सिलेन्स अवार्ड’ पाएको हो ।
काठमाडौंमा आयोजित समारोहमा संघीय मामिला तथा सामान्य प्रशासनमन्त्री भानुभक्त जोशीले बुटवल उपमहानगरपालिकाका प्रमुख खेलराज पाण्डेयलाई उत्कृष्ट नगरपालिकाको पुरस्कार, प्रमाणपत्र हस्तान्तरण गरे । देशभरका नगरपालिकाले गरेका कार्यका पाँच क्षेत्रको अध्ययनमा स्थानीय आर्थिक विकासतर्फ बुटवलले देशका सबै स्थानीय तहलाई उछिनेको जनाएको छ ।
उपमहानगरले सार्वजनिक सेवा सुदृढ गर्दै आधुनिक प्रशासनलाई जनउत्तरदायी बनाउने प्रयास गरेको प्रमुख पाण्डेयले बताए । ‘बुटवल उपमहानगरपालिका आफ्ना सबै क्षेत्र परिष्कृत गर्दै चौतर्फी विकासको मार्गमा अघि बढेको छ,’ उनले भने, ‘आर्थिक रचना र प्रणालीले मानिसको विधिपद्धति, मानव सम्बन्धमा परिवर्तन ल्याउन सक्छ ।देशकै उत्कृष्ट नगरका रूपमा पुरस्कृत हुनुले आफूहरूको काममा हौसला थपिएको भन्दै प्रमुख पाण्डेयले सरोकारवाला सबैलाई धन्यवाद दिएका छन् ।