प्रहरीले बाराबाट एकजनालाई नक्कली नोटसहित पक्राउ गरेको छ । पक्राउ पर्नेमा बारा महागढीमाई नगरपालिका- ९ कञ्चनपुरनिवासी ३५ वर्षीय रामविनय सहनिब रहेका छन्। प्रहरीले उनलाई सिम्रौनगढ नगरपालिका– ४ स्थित हरिहरपुर चेकबाट नेपाली एक हजार दरका आठथान नक्कली नोटसहित पक्राउ गरेको हो ।
इलाका प्रहरी कार्यालय सिम्रौनगढबाट खटिएको प्रहरीले बिआर ०५ जे २१८१ नम्बरको मोटरसाइकललाई जाँच गर्ने क्रममा मोटरसाइकलमा सवार उनलाई उक्त नोटसहित पक्राउ गरेको थियो ।
प्रहरीले पक्राउ परेका व्यक्तिबाट भारतीय पाँच सयको सक्कली नोट तीन थान र भारतीय नोट पाँच सयको साइजमा राखिएको सादा कागज दुई सय ८६ थनासमेत फेला पारेको इलाका प्रहरी कार्यालय सिम्रौनगढका प्रमुख प्रहरी निरीक्षक नवीन राईले जानकारी दिए ।
पक्राउ परेकालाई खोटा चलनसम्बन्धी कसुर मुद्दा दर्ता गरी बारा जिल्ला अदालतबाट पाँच दिनको म्याद थप गरी थप अनुसन्धान कार्य भइरहेको प्रहरीले जानकारी दिएको छ ।