अर्थ प्रिन्ट संस्करण

झ्यामोलोङमा हाइड्रोपावरको सेयर एलएस क्यापिटलले निष्कासन गर्ने

कास्कीको माछापुच्छ्रे गाउँपालिकामा निर्माणाधीन ३२ मेगावाट क्षमता रहेको करुवा सेती हाइड्रोपावर आयोजनाको निर्माता कम्पनी झ्यामोलोङमा हाइड्रोपावार डेभलपमेन्ट कम्पनी लिमिटेडले साधारण सेयर जारी गर्ने भएको छ । कम्पनीले एक सय रुपैयाँ अंकित दरका ५१ लाख कित्ता सेयर निष्कासनका लागि एलएस क्यापिटललाई निष्कासन तथा बिक्री प्रबन्धकमा नियुक्त गरिएको छ ।

नियुक्तिसम्बन्धी सम्झौतामा कम्पनीका कार्यकारी सञ्चालक सुनीलनारायण श्रेष्ठ तथा क्यापिटलका प्रमुख कार्यकारी अधिकृत विजयलाल श्रेष्ठले हस्ताक्षर गरेको जनाइएको छ । निकट भविष्यमा निष्कासन हुने उक्त सेयर आयोजना प्रभावित क्षेत्रका स्थानीयवासी, नेपाल सरकारको सम्बन्धित नियकाबाट श्रम स्वीकृति लिई विदेशमा रोजगारी गरिरहेका नेपाल नागरिक तथा सर्वसाधारणसमेतका लागि भएको जनाइएको छ । 

जारी पुँजी दुई अर्ब ५५ करोड रुपैयाँ रहेको झ्यामोलोङमा हाइड्रोपावर डेभलपमेन्ट लिमिटेडले करुवा सेती हाइड्रोपावर आयोजना निर्माण कार्य करिब ९० प्रतिशत सम्पन्न गरिसकेको उल्लेख छ । आयोजना निर्माण सम्पन्न गरी यसै आर्थिक वर्षभित्र विद्युत् उत्पादन गरेर राष्ट्रिय प्रसारणलाइनमा जोडी विद्युत् वितरण योजना रहेको कम्पनीले जनाएको छ ।