अन्तिम खेलमा भारतसँग एक सय ३२ रनले पराजित हुँदै नेपालले आइसिसी यू– १९ विश्वकप क्रिकेट प्रतियोगिताको अन्त्य गरेको छ । अन्तिम खेलमा सान्त्वना जितको खोजी साथ मैदानमा उत्रिएको नेपाल बलिङ र ब्याटिङ दुवैमा भारतसामु निरीह देखियो ।
भारतले दिएको दुई सय ९८ रनको लक्ष्य पछ्याएको नेपालले नौ विकेट गुमाएर एक सय ६५ रन बनायो । एक समय ४० बल खेल्दा ६ विकेट गुमाएको नेपालले ७७ रनभित्र सात विकेट गुमाइसकेको थियो । तर, कप्तान देव खनालले एक इन्डबाट केहीबेर संघर्ष गरेपछि ३९औँ ओभरमा नौ विकेट गुमाएर नेपाल एक सय २० रनसम्म पुगेको थियो ।
नौ विकेट गुमाइसकेको अवस्थामा अन्तिम जोडीका रूपमा क्रिजमा रहेका आकाश चन्द र दुर्गेश गुप्ताले अविजित ४५ रनको साझेदारी गरेपछि नेपालले पूरै पचास ओभर खेल्न सम्भव भएको हो ।
दुर्गेशले ४३ बलमा २९ तथा आकाशले ३५ बलमा १८ रन बनाए । नेपाली इनिङमा सबैभन्दा बढी रन कप्तान देवको रह्यो । उनले ५३ बलमा ३३ रन बनाए । अर्जुन कुमालले ६४ बलमा २६, दीपक बोहराले ४२ बमा २२ रन बनाए । उत्तम मगर आठ, सुवास भण्डारी पाँच, विमलविक्रम केसी र गुल्सन झा एक–एक रन तथा दीपेश कँडेल र दीपक डुम्रे शून्य रनमा आउट भए ।
त्यसअघि टस जितेर पहिले ब्याटिङ रोजेको भारतले निर्धारित ५० ओभरमा पाँच विकेट गुमाउँदै दुई सय ९७ रन बनाएको थियो । विशाल लक्ष्य खडा गर्ने क्रममा भारतका लागि सचिन दासले सर्वाधिक एक सय १६ रनको योगदान दिए । उनले एक सय एक बलमा ११ चौका र तीन छक्का प्रहार गरे ।
कप्तान उदय सहरानले एक सय सात बलमा नौ चौकाको सहायताले सय रन बनाए । त्यसैगरी आदर्श सिंहले २१ रन बनाउँदा प्रियान्सु मोलियाले १९ तथा अर्सिन कुलकर्नीले १८ रन बनाए । मुसहिर खानले अविजित नौ रन बनाए । नेपालका लागि गुल्सन झाले तीन विकेट लिए भने आकाश चन्दले एक विकेट झारे ।