एपिएफका प्रिन्स दाहाल र पुलिस क्लबका विष्णु कटुवाल प्रथम प्रकाश दाहाल स्मृति राष्ट्रिय ब्याडमिन्टन प्रतियोगिताको पुरुष एकलतर्फ क्वार्टरफाइनल प्रवेश गरेका छन् । दाहालले एपिएफकै सुजन थापालाई २१–११ र २१–१० ले हराए । कटुवालले स्पोर्टस् हबका सुनील कार्कीलाई २१–७ र २५–२३ ले पराजित गर्दै अन्तिम आठको स्थान पक्का गरेका हुन् ।
पुरुष एकलतर्फ अन्तिम आठमा पुलिस क्लबका सुनील जोशी, आर्मीका कबिर केसी, एपिएफका देवराज राना, एपिएफका अनिल मल्ल, आर्मीका प्रफुल महर्जन र नखीपोटका विवेक चौधरीले स्थान पक्का गरेका छन् ।
प्रतियोगिताको महिला एकलमा नेपाल पुलिसकी निता लम्साल र आर्मीकी अमिता गिरीले क्वार्टरफाइनल स्थान पक्का गरेका छन् । लम्सालले एपिएफकी रिना तामाङलाई २१–१०, २१–१२ हराइन् । गिरीले एपिएफकी निकिता लामाबाट वाकओभर पाइन् । आर्मीकी शेस्ना श्रीपाली, कस्तुरी कलेजकी सीमा राजवंशी, एपिएफकी शोभा गौचन, आर्मीकी रिहाना शेरचन र आर्मीकै अनुमाया राईले अन्तिम आठको स्थान सुरक्षित गरे ।
शीर्ष २० वरीयताबाहेकको पुरुष युगलतर्फको खेलमा युनिटीका अनिश गुरुङ र प्रमिश श्रेष्ठको जोडी, देवीनगरका हेमन्त ऐर र बविश थापाको जोडी, एपिएफका भोजबहादुर गुरुङ र सन्तोष पनेरूको जोडी र नवलपुरका अक्षय क्षेत्री र चितवनका बिद्धवान गुरुङको जोडीले प्रिक्वार्टरफाइनलमा स्थान पक्का गरे ।