- वि.सं २o८१ बैशाख २३ आइतबार
सञ्चार तथा सूचना प्रविधिमन्त्री रेखा शर्माले एनसेलको सेयर खरिद–बिक्रीबारे अध्ययन तथा छानबिन समितिको प्रतिवेदन प्राप्त भएपछि सरकारले निर्णय लिने बताएकी छिन्।
प्रतिनिधिसभाअन्तर्गतको शिक्षा, स्वास्थ्य तथा सूचना प्रविधि समितिको आजको बैठकमा मन्त्री शर्माले छानबिन समितिको काम अन्तिम चरणमा रहेको जानकारी दिँदै समितिको प्रतिवेदन प्राप्त भएपछि मात्र बाँकी कारबाहीको प्रक्रिया अघि बढाउने बताइन्।
उनले एनसेलको सेयर खरिद–बिक्री प्रक्रिया अहिले स्थगित रहेको बताउँदै दूरसञ्चार ऐनको संशोधनका लागि मन्त्रालयले तयारी सुरु गरेको जानकारी दिइन्।
गत मंसिर २१ गते बसेको मन्त्रिपरिषद्को बैठकले एनसेलको सेयर खरिद–बिक्रीका विषयमा अध्ययनका लागि पूर्वमहालेखापरीक्षक टंकमणि शर्मा दंगालको संयोजकत्वमा पाँच सदस्यीय छानबिन समिति गठन गरेको थियो।
सो समितिले एनसेलको हालै भएको भनिएको सेयर खरिद–बिक्री र हस्तान्तरण सम्बन्धमा भएगरेका कामकारबाहीको विस्तृत अध्ययन गरी त्यसबाट नेपालको दूरसञ्चार क्षेत्र र विदेशी लगानीमा पर्ने असर, दूरसञ्चार नियमन र सञ्चालन सम्बन्धमा सुझावसहितको अध्ययन प्रतिवेदन बुझाउनेछ।
समितिले तत्काल चाल्नुपर्ने कदम तथा दूरसञ्चार क्षेत्रका लागि भविष्यमा गर्नुपर्ने सुधारका लागि पनि राय–सुझावसहित ३० दिनभित्र प्रतिवेदन पेस गर्न सरकारले निर्देशन दिएको थियो।
मलेसियन टेलिकम कम्पनी आजिआटाले आफ्नो स्वामित्वको ८० प्रतिशत बेलायतमा दर्ता भएको स्पेक्ट्रलाइट कम्पनीसँगको सेयर बिक्रीका विषयमा नियमनकारी निकायले समयमा नै जानकारी नभएकोप्रति समितिका सदस्यले आशंका व्यक्त गरेका थिए।
