एपेक्स आइसिसी कप क्रिकेट प्रतियोगितामा मंगलबार लिभरपुल कलेजले इस्लिङटन कलेजविरुद्ध ६ विकेटको जित निकालेको छ । जितसँगै २ खेलमा २ अंक जोडेको लिभरपुल समूह ‘बी’ को दोस्रो स्थानमा छ । दुवै खेलमा पराजय व्यहोरेको इस्लिङटन पुछारमा छ ।

मूलपानी रंगशालामा इस्लिङटनले दिएको ४६ रनको लक्ष्य लिभरपुलले १२ ओभरमा ४ विकेट गुमाउँदै भेट्टाएको थियो । लिभरपुलका अभिषेक यादवले अविजित १४ र प्रज्वल खत्रीले १४ रन बनाए । इस्लिङटनका शुयस ढकालले २ र मिनाल तिमिल्सिनाले १ विकेट लिए ।

त्यसअघि टस हारेर ब्याटिङ गरेको इस्लिङटनले ११ ओभरमा सबै विकेट गुमाउँदै ४५ रन बनायो । इस्लिङटनका खालिद हसन अन्सारी र शुभम शाहले समान १० रन बनाएका थिए । लिभरपुलका विशाल केसीले ४ ओभरमा २० रन खर्चिंदै ५, चुन्चुनबाबु यादवले २ र जयराम यादवले १ विकेट लिए ।