![](https://nayapatrika.blr1.cdn.digitaloceanspaces.com/news/images/biratnagar-metro2023-08-02-01-08-23.jpeg)
विराटनगर महानगरपालिकाले बजारभित्र ठूला मालवाहक सवारीसाधन प्रवेशमा रोक लगाएको छ।
सहरभित्रको ट्राफिक व्यवस्थापनलाई सहज बनाउन र सडकको सुरक्षाका लागि महानगर क्षेत्रभित्रका मुख्य राजमार्गबाहेकका सहायक तथा भित्री सडकखण्डमा ६ चक्केभन्दा ठूला मालवाहक सवारीसाधन प्रवेशमा महानगरपालिकाले रोक लगाएको हो।
सडकको क्षमताभन्दा बढी भार भएका मालवाहक सवारी प्रवेश गर्दा निर्माण भएको छोटो समयमै भत्किने समस्या बढ्न थालेको र ट्राफिक व्यवस्थानमा पनि बाधा पुगेकाले सहरभित्र ठूला सवारीसाधन प्रवेशमा रोक लगाउनुपरेको महानगरका अध्यक्ष नागेश कोइरालाले बताए।
महानगरको घोषणापछि अबदेखि विराटनगरभित्र ढुवानीका साधनले सम्बन्धित ठाउँ र पार्किङस्थलमा मात्रै लोड–अनलोड गर्नुपर्नेछ। विराटनगरको मुख्य बजार क्षेत्रभित्र निर्माण सामग्री तथा ढुवानीका सामग्री बोकेका ६ चक्केसम्मका मालवाहक सवारीसाधनहरू राति मात्र आवतजावत गर्न पाउनेछन्।