सन्दीप लामिछानेको अलराउन्ड प्रदर्शनमा नेपाल एसिसी प्रिमियर कप २०२३ अन्तर्गत समूह ‘ए’को विजेता बनेको छ । त्रिभुवन अन्तर्राष्ट्रिय क्रिकेट मैदानमा बिहीबार कतारविरुद्ध ६८ रनको जितमा सन्दीपले बलिङतर्फ पाँच विकेट र ब्याटिङमा अविजित ४२ रनको योगदान दिएका थिए ।
समूह ‘ए’ मा शीर्ष स्थान रहँदा नेपालले ४ खेलमा सात अंक बनायो । ओमान ६ अंकसहित उपविजेता बन्यो । नेपालले पहिलो खेलमा मलेसियालाई ६ विकेट र दोस्रो खेलमा ओमानलाई ८४ रनले पराजित गरेको थियो । साउदी अरेबियाविरुद्ध तेस्रो खेल वर्षाका कारण रद्द भएपछि नेपालले अंक बाँडेको थियो । समूह ‘ए’ बाट कतार, साउदी अरेबिया र मलेसिया समूह चरणबाटै बाहिरिए ।
नेपालको प्रतिद्वन्द्वी कुवेत
नेपालले सेमिफाइनलमा समूह बीको उपविजेता कुवेतको सामना गर्ने छ । मूलपानी र त्रिवि खेल मैदानमा भएको खेलसँगै प्रतियोगिताको सेमिफाइनल समीकरण पूरा भएको छ । शनिबार हुने पहिलो सेमिफाइनलमा कुवेत र नेपालबीच कीर्तिपुरमा प्रतिस्पर्धा हुनेछ । यसैदिन संयुक्त अरब इमिरेट्स (युएई) र ओमानविरुद्ध मूलपानी मैदानमा खेल्ने छ । मूलपानीमा अप्रत्याशित रुपमा हङकङलाई ३० रनले हराएको कुवेत समूह ‘बी’ को उपविजेता बनेको हो । यस समूहमा युएई विजेता बन्यो । समान ६ अंक रहे पनि नेट रनरेटमा कुवेतलाई पछि पार्दै युएई शीर्ष स्थानमा रहेको हो । समूह बीबाट हङकङ, बहराइन र सिंगापुर बाहिरिए ।
सन्दीपको धारिलो बलिङ
नेपालले प्रस्तुत गरेको एक सय ५८ रन पछ्याएको कतार २५.१ ओभरमा ८९ रनमा समेटियो । सन्दीप र सोमपाल कामीले धारिलो बलिङ गरेपछि कतार सस्तैमा समेटियो । कतारका जहिर इब्राहिम र खुरम सहजादले समान १५ रन जोडेका थिए । अमिर फारुकले १४ रन जोड्नुबाहेक अन्य खेलाडीले दोहोरो अंकमा रन बनाउन सकेनन् ।
९.१ ओभर बलिङ गरेका सन्दीपले तीन मेडन राख्दै १४ रन मात्र खर्चिए । उनले पाँच विकेट हात पारे । सोमपालले तीन विकेट लिए । सोमपालले सात ओभरमा एक मेडनसहित २४ रन खर्चिएका थिए । यस्तै, ललितनारायण राजवंशीले दुई विकेट हात पारे ।
चलेन नेपालको ब्याटिङ
टस हारेपछि ब्याटिङमा आएको नेपालले ४०.३ ओभरमा सबै विकेट गुमाएर १५७ रनको योगफल खडा गरेको थियो । नेपालका सुरुवाती र मध्यक्रमका ब्याट्सम्यान चल्न नसक्दा १०औँ नम्बरमा क्रिजमा आएका सन्दीपले सर्वाधिक रन जोडेका थिए । सन्दीपले ५८ बलमा ६ चौकासहित अविजित ४२ रन बनाए ।
सन्दीपले ओमानविरुद्ध विश्वकीर्तिमान राख्दै एक सय विकेट पूरा गरेका थिए । सन्दीपले ललित राजवंशीसँग ४६ रनको साझेदारी गरेपछि नेपाल सम्मानजनक स्कोर बनाउन सफल भयो । १७ बल खेलेका ललितले एक रन जोडेका थिए । यसबाहेक, कप्तान रोहितकुमार पौडेलले २७, ओपनर आसिफ शेखले १९ रन जोडे । दीपेन्द्रसिंह ऐरीले १२ रन बनाउँदा सोमपाल र आरिफ शेखले समान ११ रन जोडेका हुन् । बलिङतर्फ कतारका अमिर फारुकले चार विकेट लिए । ९.३ ओभर बलिङ गरेका फारुकले ४२ रन खर्चिएका थिए । यस्तै, ओवाइस अहमेद तीन र जयान मुनाविराले दुई विकेट लिए ।
कुवेतले हङकङलाई हरायो
कुवेतले बलियो मानिएको हङकङलाई ३० रनले पराजित गरेको छ । मूलपानी मैदानमा दुई सय ७३ रनको लक्ष्य पाएको हङकङ निर्धारित ५० ओभरमा सबै विकेट गुमाउँदै दुई सय ४२ रनमा समेटिएको थियो । हङकङका कप्तान निजाकत खानले सर्वाधिक ६० रन बनाए । उनले ९७ बलमा एक चौका र दुई छक्का हिर्काएका थिए । अजिज खानले ४९, यासिन मुर्तजाले ४३, जिसन अलीले २४, अंशुमन रथले १३ र हरून अर्सदले १२ रनको योगदान गरे । चौथो विकेटका लागि निजाकत र अजिजले ९१ रनको साझेदारी गरेका थिए । कुवेतका शाहरूख क्युदसले ३ विकेट लिए ।
यसअघि टस हारेर ब्याटिङ गरेको कुवेतले निर्धारित ५० ओभरमा आठ विकेट गुमाउँदै दुई सय ७२ रन बनाएको थियो । कुवेतका शिराज खानले सर्वाधिक ६७ रन बनाएका थिए । यस्तै, उस्मान पटेलले ५०, ओपनर आदनान इड्रिसले ४५, कप्तान मोहम्मद अस्लामले ३२, सैयद मोनिबले ३१ र बिलालले अविजित १७ रनको योगदान गरे । छैटौँ विकेटका लागि शिराज र उस्मानले ८४ रनको साझेदारी गरेका थिए । हङकङका एहसान खानले सर्वाधिक तीन विकेट लिएका थिए ।
ललितले साथ दिँदा धेरै रन बन्यो
सन्दीप लामिछाने, लेग स्पिनर, नेपाल
कतारविरुद्ध दबाब थिएन । कतारविरुद्ध सामान्य प्रक्रियागत नै क्रिजमा थियौँ । धेरैभन्दा धेरै रन जोड्नु थियो । एक–एक रन महत्वपूर्ण थियो, त्यसरी नै खेल्दै गयौँ । अर्धशतकको बारेमा सोचेको थिइनँ । सक्दो रन बनाउने मात्रै ध्यान थियो । क्रिजमा ललितले साथ दिँदा धेरै रन बन्न सफल भयो । अन्तिममा मात्रै ब्याटिङ अवसर पाउने हुँदा प्रमाणित गर्ने समय सम्झेर खेल्यौँ ।
हामीमाथि दबाब थिएन
ललित राजवंशी, खेलाडी, नेपाल
कतारविरुद्ध दबाब लिएनौँ । बलिङमा राम्रो भयो । हामीले नेटमा यस्तो अभ्यास गरिरहेकाले सहज भयो । सन्दीपलाई रन बनाउन साथ दिन्छु, आउट हुँदिनँ भनेको थिएँ । सोहीअनुसार रन पनि बनेको थियो । बलिङतर्फ पावर प्लेमा विकेट झार्न नसके रन धेरै नदिने रणनीति थियो । त्यसमा हामी सफल भयौँ ।
सन्दीपले राम्रो प्रदर्शन गरे
मोहम्मद रिजवान, कप्तान, कतार
हामीले सुरुवात राम्रो गरेका थियौँ । विकेट धेरै राम्रो थियो । बलरमैत्री रह्यो । सन्दीपले आफूलाई प्रमाणित ग¥यो । नेपालका शीर्ष ६ ब्याट्सम्यान चलेका थिएनन् । तर, सन्दीप बलिङ र ब्याटिङमा सानदार प्रदर्शन गर्न सफल रहे । सन्दीपकै कारण हामीले राम्रो गर्न सकेनौँ । नेपालसँग फेरि खेल्न मन छ ।