खेलकुद प्रिन्ट संस्करण

चार विधाका मनोनयन सार्वजनिक

पोखरा स्पोर्टस् अवार्डमा वितरण गरिने चार विधाका समान तीन खेलाडी मनोनयनमा परेका छन् आयोजक नेपाल खेलकुद पत्रकार मञ्च गण्डकीले बुधबार तीन–तीनजना खेलाडीको नाम सार्वजनिक गरेको हो । विश्व खेलकुद पत्रकार दिवसको अवसरमा २३ वैशाखमा अवार्ड कार्यक्रम हुनेछ ।

खेल क्षेत्रमा महत्वपूर्ण योगदान दिएका विभिन्न सात विधामा उत्कृष्ट समान एकजनालाई अवार्ड प्रदान गरिने मञ्च गण्डकीका अध्यक्ष दिननाथ बरालले जानकारी दिएका छन् । प्रदेशका ११ जिल्लामा गरेको र गत वर्ष उत्कृष्ट प्रर्दशन गरेकामध्येबाट चार विधाका लागि तीन तीनजना छनोट गरिएको बरालले बताए ।

उत्कृष्ट पुरुष खेलाडीमा बागलुङका करण केसी (क्रिकेट), तनहुँका गंगाबहादुर कुँवर (आर्चरी) र कास्की प्रदीप खड्का (लनटेनिस) रहेका छन् । यसैगरी, वर्ष उत्कृष्ट महिला खेलाडीमा बागलुङकी रोजिना थापामगर (आर्चरी), लमजुङकी सावित्रा भण्डारी (फुटबल) र बागलुङकी सुस्मिता थापा (आइटिएफ तेक्वान्दो) छन् । 

उत्कृष्ट प्रशिक्षक विधामा स्याङ्जाका किशोरकुमार गुरुङ (आर्चरी), कास्कीका नीरज थापा (टेनिस) र कास्कीका सुरज सुनार (आइटिएफ तेक्वान्दो) रहेका छन् । वर्ष उदीयमान खेलाडीतर्फ बागलुङका रवि केसी (भलिबल), कास्कीका सुमित श्रेष्ठ (फुटबल) र बागलुङका सुवास भण्डारी (क्रिकेट) रहेको आयोजकले जनाएको छ । अन्य तीन विधामध्ये लाइफ टाइम अचिभमेन्ट अवार्ड पाउनेको व्यक्तित्व केही दिनमै सार्वजनिक हुनेछ । वर्ष उत्कृष्ट खेल संघ र उत्कृष्ट पत्रकारिता अवार्डको विजेताको नाम सीधै कार्यक्रममा घोषणा हुनेछ ।