समाचार डिजिटल संस्करण

तालढुंगा आधारभूत अस्पताल निर्माण सम्पन्न अनिश्चित

देशैभरिका स्थानीय तहमा १० देखि १५ शय्याको अस्पताल भवन निर्माण गर्ने गरी तत्कालीन प्रधानमन्त्री केपी ओलीले ०७७ मंसिर १५ गते अस्पताल भवन शिलान्यास गरेका थिए । सरकारको ‘एक स्थानीय तह एक अस्पताल’को नीतिअनुरूप काभ्रेको पाँच स्थानीय तहमा पनि अस्पताल भवन निर्माण हुने भएको थियो ।

शिलान्यास गरिएकामध्ये जिल्लाको महाभारत गाउँपालिका, रोसी गाउँपालिका, मण्डनदेउपुर नगरपालिका र धुलिखेल नगरपालिकामा अस्पताल भवन निर्माण भइसकेको छ । मण्डनदेउपुरले त सञ्चालनमा नै ल्याइसकेको छ । तर, खानीखोला गाउँपालिकामा भने अहिलेसम्म अस्पतालको भवन निर्माण अनिश्चित छ ।

गाउँपालिकाको वडा नं. ५ स्थित तालढुंगा स्वास्थ्यचौकीलाई स्तरोन्नति गरी १० शय्याको अस्पताल बनाउने भनिए पनि भवन निर्माणकार्य रोकिएको छ । ०७८ असार २९ गते तुन्दी–जम्बुदीप जेभी निर्माण कम्पनीले ठेक्का पारेर निर्माण गरिरहेको अस्पताल भवनको निर्माण सम्पन्न हुने मिति अनिश्चित भएको हो । ०७९ असार मसान्तसम्ममा अस्पतालको भवन निर्माण सम्पन्न भइसक्नुपर्ने भए पनि कहिले जग्गादाता त कहिले ठेक्का सम्झौतामा त्रुटिका कारण बजेट निकासा नहुँदा निर्माणकार्य रोकिएको हो ।

सम्झौताअनुसार निर्माण सम्पन्न गर्न नसकेपछि पुनः एक वर्षको म्याद थप भए पनि अझै निर्माण सम्पन्न हुने छाँटकाँट छैन । १६ करोड ६४ लाखमा टेन्डर आह्वान गरेकोमा करिब १२ करोडमा सम्झौता भएको अस्पताल भवनको निर्माण कम्पनीले साढे दुई करोड निकासा गरिसकेको छ । निर्माण कम्पनीले लगभग साढे २ करोड भुक्तानी लिन बाँकी छ । तर, बागमती प्रदेश सरकारबाट बजेट निकासा नहुँदा भवन निर्माणको काम रोकिएर अलपत्र परेको हो ।

ठेक्का सम्झौतामा त्रुटि
ठेक्का सम्झौता गर्दा गाउँपालिकाको आफ्नौ स्रोत नहुँदा बहुवर्षीय ठेक्का सम्झौता गर्नुपर्ने थियो । तर, उक्त अस्पताल भवनलगायत भौतिक संरचना निर्माणका लागि ठेक्का सम्झौता गर्दा बहुवर्षीय सम्झौता नगरेका कारण अहिले निर्माणको काम रोकिएको गाउँपालिकाका अध्यक्ष इन्द्रबहादुर थिङ ‘छिन्ताङ’ले बतााए ।

‘तत्कालीन अवस्थामा ठेक्का सम्झौता गर्दा प्रदेश सरकारसँग बहुवर्षीय स्वीकृत गरेर सम्झौता गर्नुपर्थ्याे, तर त्यसवेला गर्नुभएन छ । त्यसकारण अस्पताल भवन निर्माणको काम रोकिएको हो,’ गाउँपालिकाका अध्यक्ष थिङले भने, ‘बहुवर्षीय स्वीकृत नगर्दा बागमती प्रदेश सरकारले आफ्नो दायित्वमा नराख्ने रहेछ ।’ ठेक्का सम्झौता गर्ने समयमा गाउँपालिकाको अध्यक्षमा कृष्णबहादुर खुलाल र उपाध्यक्षमा रुकमणि गुरुङ राना थिए ।

सरासर काम भएको भए अहिलेसम्ममा काम सम्पन्न भइसक्ने थिङले बताए । बजेट निकासा नहुँदा काम रोकिएको उनको भनाइ छ । काम सञ्चालन गर्न पालिकाको तर्फबाट बागमती प्रदेशमा धेरैपटक धाएको, तर स्वास्थ्य मन्त्रालयले अर्थ मन्त्रालयलाई र अर्थले स्वास्थ्य मन्त्रालयलाई देखाउँदा काम रोकिएको थिङले बताए ।

‘तत्कालीन जनप्रतिनिधिले ठेक्का सम्झौता गर्दा कि आफ्नै स्रोत छ भनेर गर्नुपर्थ्याे, कि त प्रदेश सरकारसँग बहुवर्षीय स्वीकृत गरेर गर्नुपर्थ्याे,’ उनले भने, ‘त्यसो नगर्दा बजेट रोकियो र काम रोकिएको अवस्था हो ।’ हालसम्म पाँच करोड रुपैयाँको काम भए पनि ठेकेदार कम्पनीलाई साढे दुई करोड मात्र भुक्तानी नभएको गाउँपालिका अध्यक्ष थिङले बताए ।