Skip This
अस्ट्रेलियाको सिड्नीमा नयाँ वर्षको दिनको संगीत महोत्सवमा प्रहरीले गरेको कारबाहीपछि ९७ जनालाई लागुऔषध अपराधको अभियोग लगाइएको छ।
सोमबार जारी गरिएको विज्ञप्तिअनुसार न्यु साउथ वेल्स राज्यको प्रहरीले आइतबार आयोजित उत्सव कार्यक्रमलाई लक्षित गरी अपरेसन सुरु गरेको थियो। सिड्नीको पूर्वी किनारमा भएको यस कार्यक्रममा २७ हजारभन्दा बढी मानिस उपस्थित भएका समाचारमा जनाइएको छ।
९७ जनाले एमडिएमए, एम्फेटामाइन, गाँजा, कोकिन, एक्स्टेसी, एलएसडी, केटामाइन र साइलोसाइबिनलगायतका अवैध लागुऔषध ओसारपसार गरेको प्रहरीले जनाएको छ। तीमध्ये तीनजना लागुऔषध ओसारपसार मुद्दामा पक्राउ परेका छन्।
एक २१ वर्षीय पुरुषसँग १५ वटा एमडिएमए क्याप्सुल, अर्का एक पुरुषसँग नाैवटा क्याप्सुल र २५ वर्षीया महिलासँग पाँचवटा एमडिएमए क्याप्सुल बरामद भएको बताइएको छ।
