- वि.सं २o७९ पौष ५ मंगलबार
कवि विनोदविक्रम केसीले सोमबार काठमाडौंस्थित मण्डला थिएटरमा एकल कविता वाचन गरेका छन् । सुसेला सांगीतिक समूहले आयोजना गरेको कार्यक्रममा कवि, सर्जक तथा दर्शकको उपस्थिति थियो ।
कार्यक्रममा केसीले ‘प्रेम एक भोक’, ‘मृतक प्रेमीको फिर’, ‘निमुखा मोमटाजहरू’, ‘प्रेम केही प्रकरण’, ‘गोल्ड मेडल’, ‘तपाईं सिसिटिभीको नियन्त्रणमा हुनुहुन्छ’ लगायत झन्डै एक दर्जन कविता वाचन गरे ।
कार्यक्रममा कवि विमल निभाले विनोदविक्रमलाई ‘बागी कवि’ भनेर सम्बोधन गरे । ‘विनोद बागीहरूको प्रतिनिधि हुन्,’ उनले भने । त्यसैगरी, कवि भुपाल राईले केसीको ‘नेपाल सानै छ देवकोटाजी’ कविता वाचन गरे । केसीले समाजलाई फरक तरिकाले हेर्ने गरेको भन्दै राईले प्रशंसा गरे ।
‘अरूले सुल्टो तरिकाले हेर्छन्, विनोदजीले उल्टो तरिकाले हेर्छन् । त्यसकारण विनोदका कविताभित्र पनि धेरै कविता हुन्छन्,’ रार्ईले भने । कार्यक्रममा शान्तिप्रिय बन्दनाले कवि केसीको ‘गितार भिरेकी केटी’ कविता वाचन गरेकी थिइन् ।
