- वि.सं २o८२ भदौ २२ आइतबार
धनकुटामा अलैँची उत्पादन बढेसँगै निर्यात पनि वृद्धि भएको छ । गत वर्ष मात्र धनकुटाबाट आठ करोडभन्दा बढीकाे अलैँची निर्यात भएको छ ।
खोल्सीको कालो सुनको नामले चिनिने अलैँची आर्थिक वर्ष ०८१/८२ मा धनकुटाबाट आठ करोड ५० लाख ६३ हजारबराबरको निर्यात भएको कृषि ज्ञान केन्द्र धनकुटाले जनाएको छ । अघिल्लो आर्थिक वर्ष ०८०/८१ को तुलनामा गत आर्थिक वर्षमा ५.२ मेट्रिक टन अर्थात् एक करोड चार लाखभन्दा बढीको अलैँची निर्यात भएको कृषि ज्ञान केन्द्रले जनाएको छ ।
गत आर्थिक वर्ष धनकुटामा करिब १२७ हेक्टर क्षेत्रफलमा अलैँची खेती गरिएको थियो । उक्त अलैँची खेतीबाट करिब ४० मेट्रिक टन अलैँची उत्पादन भएको कृषि ज्ञान केन्द्र धनकुटाका प्रमुख नगेन्द्र रानाले बताए । पछिल्लो समय अलैँचीले उचित मूल्य पाएसँगै कृषकहरू अलैँची खेतीमा आकर्षित हुन थालेका छन् ।
अहिले अलैँची प्रतिमन ७५ हजारदेखि ९५ हजार रुपैयाँसम्म बिक्री हुँदै आएको छ । विभिन्न खालका रोगको प्रकोपका कारण सखाप बनेका जिल्लाका कतिपय अलैँची खेतीका बगानहरूमा पनि पछिल्लो समय उत्पादन हुन सुरु भएको कृषि ज्ञान केन्द्रका प्रमुख रानाले बताए । अलैँची खास गरेर खोलाखाल्सी, भिरालो, तर ओसिलो जमिनहरूमा उत्पादन हुने गर्दछ । अलैँचीले कम लागत र परिश्रममा राम्रो आम्दानी दिने गर्दछ ।
