- वि.सं Invalid date format
बंगलादेशका बायाँहाते अलराउन्डर साकिब अल हसनले टी–२० क्रिकेटमा पाँच सय विकेट पूरा गरेका छन् । उनी यो सफलता प्राप्त गर्ने विश्वकै पाँचौँ बलर हुन् ।
पाँच सय विकेट लिने पहिलो बाँयाहाते स्पिनरका रूपमा साकिबले कीर्तिमान पनि बनाएका छन् । उनले टी–२० फर्म्याटमा सात हजार रन जोड्ने पहिलो बायाँहाते खेलाडी हुन् । क्यारेबियन प्रिमियर लिग (सिपिएल)मा एन्टिगुवा एन्ड बरबुडा फाल्कन्सबाट खेल्दै उनले आइतबार राति टोलीलाई जित दिलाउने क्रममा दुईवटा रेकर्ड राखे । उनले सेन्ट किट्स एन्ड नेभिस प्याट्रियट्सविरुद्ध ११ रन मात्र दिएर तीन विकेट लिएका थिए ।
यसअघि, अफगानिस्तानका रासिद खान (६६०), वेस्ट इन्डिजका ड्वेन ब्राभो (६३१) र सुनील नारिन (५९०) र दक्षिण अफ्रिकाका इमरान ताहिर (५५४)ले सफलता प्राप्त गरेका थिए । साकिब पहिलो बायाँहाते स्पिनरका रूपमा ५०० विकेटको क्लबमा प्रवेश गरेका हुन् । प्याट्रियट्सले पहिले ब्याटिङ गर्दै एक सय ३३ रन बनाएको थियो । फाल्कन्सले निर्धारित ओभरअगाडि नै लक्ष्य पूरा गर्यो । लक्ष्य पछ्याएको इनिङ्समा साकिबले १८ बलमा २५ रन जोडेका थिए । बलिङ क्रममा साकिबलाई पाँच सय विकेट संख्या पूरा गर्न एक विकेटको खाँचो थियो ।
उनले पाकिस्तानका मोहम्मद रिजवानलाई १५औँ ओभरमा कट एन्ड बोल्ड गर्दै पाँच सय विकेटको कीर्तिमान पूरा गरे । त्यसपछि अर्को ओभरमा उनले दुई विकेटका रूपमा मायर्स र नवीन बिडासलाई आउट गरे । खेलमा उनले ११–३ को रेकर्ड राखे । वेस्ट इन्डिजका ब्राभोले टी–२० खेलमा ६ हजार ९७० रन र ६३१ विकेट लिएका छन् । वेस्ट इन्डिजकै एन्ड्रे रसेल रेकर्ड पछ्याइरहेका छन् । उनले नौ हजार ३६१ रन र ४८७ विकेट लिएका छन् ।
साकिबले टी–२० मा नौपटक प्लेयर अफ द सिरिजको अवार्ड जितेका छन् । टी–२० फर्म्याटमा सर्वाधिक म्यान अफ दी सिरिज हुने खेलाडीमा उनी पर्छन् । भारतका विराट कोहली दोस्रो स्थानमा छन् ।
