घन्टी बजाएर चितवनबाट सुरु भयो रास्वपाको ‘जनयात्रा’

राष्ट्रिय स्वतन्त्र पार्टी (रास्वपा)ले पार्टी सभापति रवि लामिछानेको निर्वाचन क्षेत्रबाट ‘जनयात्रा’ सुरु गरेको छ । भारतपुर महानगरपालिका–१० स्थित गेस्टहाउस चौरमा आयोजित सभालाई सम्बोधन गर्नुअघि नेताहरूले पार्टीको चुनाव चिह्न ‘घन्टी’ बजाएर अभियानको औपचारिक उद्घाटन गरेका हुन् । अभियान उद्घाटनमा बोल्ने नेताहरूले सभापति रविको द्रुतगतिमा भएको पक्राउमाथि प्रश्न उठाएका छन् । 

पार्टी केन्द्रीय समितिको निर्णयअनुसार जनयात्रामा सभापति लामिछानेले सम्बोधन गर्ने कार्यक्रम तय गरिएको थियो । तर, उच्च अदालत तुलसीपुरको संयुक्त इजलासले सुप्रिम सहकारी प्रकरणमा जिल्ला अदालतको फैसला बदर गर्दै उनलाई थुनामा राख्न आदेश दिएपछि शुक्रबार राति नै प्रहरीले लामिछानेलाई पक्राउ गरी शनिबार बिहान बुटवल पुर्‍याएको छ । कार्यक्रममा उनले केही महत्वपूर्ण विषय सार्वजनिक गर्ने घोषणा गरेका थिए ।

‘जनयात्रा’ अभियान उद्घाटन सभामा पार्टी उपसभापति डा. स्वर्णिम वाग्लेले चितवनमा हुने कार्यक्रममा सभापति लामिछानेलाई बोल्न नदिनकै लागि सम्पूर्ण राज्यशक्ति प्रयोग गरेर रातारात पक्राउ गरिएको आरोप लगाए । ‘सभापतिले आफैँ उपस्थित भई गिरफ्तारी दिन तयार रहेको जानकारी गराउनुभएको थियो । तैपनि सरकारमा रहेका दुई ठुला दलले राज्यशक्तिको दुरुपयोग गर्दै जबर्जस्ती गिरफ्तार गरेका छन्,’ उनले भने । वाग्लेले सभापति रविले चितवनमा महत्वपूर्ण कुरा गर्ने घोषणा गरेसँगै सरकारले उनलाई चितवनसम्म पुग्नै नदिने प्रपञ्च रचेको बताए । ‘सभापतिज्यूले चितवनमा केही विशेष कुरा राख्ने घोषणा गर्नुभएको थियो । सरकारमा बसेकालाई उहाँको कुराले डर भएको हुनुपर्छ,’ उनले भने, ‘त्यही कारण उहाँलाई चितवनको कार्यक्रममा सहभागी हुन नदिन सरकारले प्रपञ्च गरेको हो ।’ 

बदनियत राखेर सरकारले सभापतिलाई चितवनको कार्यक्रमअघि पक्राउ गरेको उनले दाबी गरे । ‘सभापतिले चितवनको कार्यक्रममा सहभागी भएर कहाँ जानुपर्ने हो जान्छु भन्नुभएको थियो । तर, उहाँलाई चितवनको कार्यक्रममा सहभागी हुनै नदिने उद्देश्यले पक्राउ गरियो,’ उनले भने, ‘फैसला आएको दुई घण्टा पनि नबित्दै दुनियाँको सबैभन्दा ठुलो अपराधीलाई झैँ पक्राउ गरियो । सरकारको यो कार्य असाध्यै निन्दनीय छ ।’

उनले अदालतको आदेश र पक्राउ संशययुक्त रहेको दाबी गरे । ‘अदालतको फैसला भारत र क्यानडाको उदाहरण दिएर लेखिएको छ । निकै विद्वान्हरूले फैसला लेखेजस्तो देखिन्छ, तर बहस सकिएको दुई घण्टामा त्यसरी फैसला लेख्न सकिँदैन,’ उनले भने, फैसला हिजो नै लेखिएको होइन, त्यो पहिले नै तयार गरिएको हो ।’

जनयात्राका संयोजक एवं रास्वपा संसदीय दलका उपनेता विराजभक्त श्रेष्ठले सरकारले आफूहरूलाई कालकोठरीमा राखेर सिध्याउन खोजे कल्पवृक्ष बनेर फैलिने बताए । ‘सरकारमा बसेकाले हामीलाई गाड्न खोजेका छन्, लखेट्न खोजेका छन् र कालकोठरीमा राखेर सिध्याउन खोजेका छन् । तर, हामी झनै कल्पवृक्ष भएर फैलिन्छौँ,’ उनले भने, ‘हामीलाई कसैले झुक्याउन सक्दैन । फलामलाई जति तताएर पिट्यो त्यति नै राम्रो तरबार बन्छ ।’

सांसद हरि ढकालले पार्टी सभापति रवि लामिछानेको अन्तिम इच्छा ३५ वर्षसम्म देश लुटेकालाई पाता कसेर जेलभित्र दशदान र वैतरणी गर्ने रहेको बताए । शुक्रबार राति प्रहरीले सभापति लामिछानेलाई पक्राउ गर्नुअघि सोधेको अन्तिम इच्छाको जवाफ ढकालले दिएका थिए । ‘शुक्रबार सभापतिलाई पक्राउ गर्नुअघि अन्तिम इच्छा के छ भनेर सोधियो । म भन्छु सभापति र पार्टीको अन्तिम इच्छा ३५ वर्षसम्म देश लुटेकालाई पाता कसेर जेलभित्रै दशदान र वैतरणी गर्ने छ,’ उनले भने, ‘किसानको मुहारमा हाँसो ल्याउने अन्तिम इच्छा छ । युवा पलायन रोक्ने र रोजगारी सिर्जना गर्ने अन्तिम इच्छा छ । दलीयकरण र भ्रष्टाचारविरुद्ध सशक्त आवाज बोकेर विधिको शासन स्थापना गर्ने अन्तिम इच्छा छ ।’ सांसद ढकालले प्रहरीको शैलीको विरोध गर्दै भने, ‘रविको मुटुमा रगत नभएर तेजाब छ, जसले तिमीहरू सबैलाई जलाउनेछ । दियो मसाल बनेको छ । यसले ०८४ मा तिमीहरूलाई खाक बनाउनेछ ।’

कार्यवाहक महामन्त्री कवीन्द्र बुर्लाकोटीले जनयात्राका क्रममा पार्टीले गर्ने बहस र पार्टीले बोकेका सन्देशबारे जानकारी गराएका थिए । उनका अनुसार स्वतन्त्र, गैरदलीय, प्रतिष्ठित व्यक्तिलाई राष्ट्रपति बनाउने, प्रत्यक्ष निर्वाचित प्रधानमन्त्री र प्रधानमन्त्रीद्वारा नागरिकबाट चयन गरिएका योग्य व्यक्तिको मन्त्रिमण्डल र राष्ट्रिय सभालाई विद्वत् वर्गको राष्ट्रियता झल्कने थलोका रूपमा विकास गर्ने रास्वपाको एजेन्डा छ । यस्तै, प्रदेश सभा खारेज गर्ने र स्थानीय तहका जनप्रतिनिधि सम्मिलित प्रदेश परिषद् निर्माण गरी उक्त परिषद्लाई विधायकी अधिकारी दिने, प्रत्यक्ष निर्वाचित मुख्यमन्त्रीको नेतृत्वमा पाँच सदस्यीय मन्त्रिपरिषद् भएको सातवटा प्रदेश सरकार बनाउने र विदेशमा रहेका नेपालीलाई मताधिकारको व्यवस्था गर्ने विषय जनयात्राको सन्देश छ ।