- वि.सं २o८१ फाल्गुण १६ शुक्रबार
मकवानपुरको इन्द्रसरोवर गाउँपालिका– ३ का एक युवकको शव बागमती नदी किनारमा भेटिएको छ । उक्त शव इन्द्रसरोवर– ३ स्थित दोभानका ३५ वर्षीय श्याम न्यासुरको रहेको मकवानपुर प्रहरीले जनाएको छ ।
मकवानपुर प्रहरी प्रवक्ता डिएसपी श्यामु अर्यालका अनुसार आफूखुसी घर छोडी हिँडेका न्यासुरको खोजीका क्रममा उनलाई मृत अवस्थामा बागमती नदी किनारमा भेटिएको हो । घटनास्थल उनको घरभन्दा करिब दुई किलोमिटर पर रहेको उनले जानकारी दिए ।
न्यासुरको शव इन्द्रसरोवर– ३ दोभानस्थित बागमती नदीको बिचमा ढुंगामा अल्झेको अवस्थामा फेला परेको हो । स्थानीयले शव देखेर खबर गरेपछि सिस्नेरी प्रहरी चौकी र इलाका प्रहरी कार्यालय भीमफेदीको टोलीले उक्त शव न्यासुरको भएको पत्ता लागेको प्रवक्ता अर्यालले बताए ।
शव पोस्टमार्टमका लागि हेटौँडा अस्पताल ल्याइएको र घटनाको आवश्यक अनुसन्धान भइरहेको उनले जानकारी दिए ।
2022-09-29-12-22-58.jpeg)
